Casi 800.000 reservacion di crucero a keda afecta pa e decision di e gobierno di Merca pa via di e prohibicion sin advertencia di e biahenan pa Cuba, Asociacion Internacional de Linea di Crucero (CLIA, na Ingles) a informa diaranson pasa.
Den un declaracion, CLIA a informa cu e medida a drenta na vigor diaranson pasa sin haci un calculo di e dañonan economico ni huicionan di balor, aunke si a resalta cu ta afecta algun biahenan ‘cu tabata aproba anteriormente’ pa e gobierno di Merca.
‘Sin advertencia, e miembronan di CLIA ta obliga pa cancela tur e cruceronan pa Cuba inmediatamente’, e declaracion cu CLIA a haya ta bisa.
E asociacion ta indica cu tin casi 800.000 reservacion di biahe programa of cu ta andando caba y cu e decision anuncia diamars pasa ta afecta.
Tur e reservacionnan tabata originalmente emiti pa gobierno di Merca durante presidencia di Barack Obama, bou un permiso general cu tabata autorisa e biahenan denomina ‘di pueblo pa pueblo’ pa Cuba, CLIA a señala.
E prome crucero autorisa pa biaha Cuba for di Merca den mas di 50 aña, tabata Adonia, di Fathom, un compania filial di Carnival, cu a sali for di Miami riba prome di mei di 2016 cu destino pa La Habana.
Bou e regulacionnan nobo, biaha pa Cuba na crucero for di Merca ta ilegal y tambe ta afirma cu no tin control riba e situacion desde cu e prohibicion a cay y nan ta ‘sinti pena’ pa e pasaheronan cu tabata desea biaha pa e destino cu nan a reserva.
