Un usuario di Twitter a divulga imagen di un monton di sushi den porta di un scol den un bario di Habana, pa duna un impresion di e problema persistente di e sistema di recoge desperdicio na e capital Cubano.
Entre e deficiencianan cu mas ta afecta habitantenan di Habana den bida diario, yegando casi na e 500 aniversario di e ciudad capital (16 di november 2019), ta e recoleccion di desperdicio. Algun tempo pasa tabata den noticia e esfuersonan di municipio y gobierno nacional pa atende e problema aki, en preparacion di e festividadnan relaciona cu e celebracion di e aniversario, unda lo tin un gran cantidad di huesped di exterior cu lo bishita e isla.
Sin embargo, e problema ta parce di ta sigui sin solucion. Den e caso di e scol riba e imagen, e usuario di Twitter ta bisa cu e situacion di e scol no ta algo nobo, sino algo di bastante tempo caba.
Otro aspecto di e descuido aki ta tambe e menasa pa salud di e menornan cu ta atende scol, mas ainda pasobra e pais mescos varios otro den e region, ta enfrentando problema considerable cu dengue.
Mal trabao di e servicio municipal y e cantidad limita di container disponibel ta na base di e problema na Habana. Loke ta añadi na e problema ta cu e habitantenan mes ta kibra e container o ta yena nan cu material no apto, manera escombro di construccion.
Di municipio Boyeros un lector a manda recientemente imagen di un dump cu tabatin 12 aña ta molestia su famia pa redaccion di Cibercuba. “Tin animal morto, djaca, musca, sangura y un holor insoportable y e sushedad ya ta blokea e caya.”
