Presidente di Cuba, Miguel Diaz-Canel, a confirma cu for di 2020 e plannan economico ‘no lo yega for di ariba’, y e trahadonan lo bay ta esunnan cu lo diseña e metanan di e empresa estatal, ‘un medida audaz’ di Gobierno pa intenta salba e economia daña di e isla.
E prome mandatario Cubano, cu no ta di fam Castro den casi sesenta aña, a referi na e directiva nobo ora di clausura e congreso di economista, necesario ‘pa aplica cu exito e decision’, diasabra pasa e corant estatal Granma a skirbi.
Cu e descentralisacion di su economia, Cuba ta pone fin na decadanan di verticalidad den su plannan economico, un metodo cu si ta eficaz na su prome añanan di Revolucion, awe a converti den un molestia pa e nacion Caribeño, cu tin e empeño di no cay den un crisis intenso como esun di ‘periodo special’ di e decada di aña nobenta.
Pa hopi specialista e desafio principal di e transformacion ey ta radica pa cambia e cultura ‘vertical’, cu no ta cuestiona e orden di un superior structura. “Pa e medida aki, cu tabata reclama desde añanan pasa, ta efectivo, ta necesario un cambio di mentalidad. Salta pa e momento nobo y sa cu e Plan no lo yega desde ariba. Ta trata di un medida audaz y revolucionario cu ta exigi obhetividad, realismo y consciencia”, Díaz-Canel a insisti.
Segun e presidente Cubano, e corupcion y ilegalidad, e nivel poco di spaar, e debe y e ingreso insuficiente pa exportacion, ta entre e molestia principal di economia di e isla, cu ta trata di aleha e fantasma di e recesion, cu a re aparece na 2016 (-0,9%) pa prome biaha na mas di 20 aña.
