E regimen Cubano a dicidi di bisa ayo formalmente na comunismo. E concepto a keda elimina di e propuesta pa reforma di constitucion cu ta den preparacion, segun e medionan oficial di e isla a duna di conoce diasabra pasa.
Den e proceso di liberalisacion controla di e modelo economico, gobierno di Cuba ta inclui den texto nobo di constitucion e reconocimento di propiedad priva y ta deshaci di e referencia na e ideologia comunista, aunke socialismo ta sigui como politica oficial di estado.
E constitucion vigente, di 1976 y redacta similar na esunnan di e bloke socialista di e tempo ey, tin inclui den su articulo 5 e obhetivo di “avance den direccion di e sociedad comunista.” Cu e reforma constitucional aki, e idea aki lo desaparece. Un cambio di enorme transcendencia historico cu gobierno ta presenta como un mero adaptacion di lenguahe,na e fase nobo di continuidad revolucionario. “No kier men cu nos ta renuncia nos ideanan, sino cu den nos vision nos ta pensa riba un pais socialista, soberano, independiente, prospero y sostenibel”, e presidente di e Asamblea Nacional, Esteban Lazo, a declara diabierna pasa.
E parlamento di un solo camara Cubano a inicia diasabra un sesion cu ta dura te awe, den cual e diputadonan ta discuti e texto di e reforma pa aproba esaki pa e keda someti na consulta popular.
Ideologicamente, Cuba lo keda den e situacion paradoxal di distancia di e idea di comunismo den su constitucion sin stop di reconoce partido comunista di Cuba como maximo organo den dirigencia di e pais. E proyecto di reforma, segun e diario oficialista Granma, “ta ratifica e caracter socialista di e Revolucion y e papel rector di e Partido” y e “irevocabilidad di e modelo politico y economico.”
Di otro banda, e texto nobo di e constitucion ta habri caminda pa e posibilidad pa legalisa e matrimonio homosexual. Segun Homero Acosta, secretario di e Conseho di Estado a afirma den Asamblea Nacional, den articulo 68 ta defini matrimonio como e union “entre dos persona (…) y no ta bisa di ki sexo”.
Den e constitucion vigente di 1976 ta contempla solamente e union matrimonial entre muhe y homber.
Lider di e movemento ta Mariela Castro, yiu di Raul Castro y directora di e Centro Nacional di Educacion Sexual di Cuba. Gruponan evangelico na e isla a manifesta den ultimo dianan nan desacuerdo cu e cambio legal aki.
(fuente: ElPais/ElNuevoHerald)
