(CiberCuba) – Oficina Nacional de Administracion Tributaria de Cuba (ONAT) a adverti e personanan natural of huridico cu e luna aki ta bay desaroya un plan pa persigui esnan cu no a haci nan declaracion di impuesto den e tempo cu ley ta establece, of cu a purba defrauda impuesto.
E programa ta abarca e debenan di empresanan estatal y priva, e trahadonan cu ta traha riba nan mes, artista y creadornan di e sector di cultura y su personal di apoyo; comunicadornan social y diseñadornan, personal cu ta labora na sucursalnan stranhero, productornan individual di e sector agricultor y otro personanan natural.
ONAT lo identifica tambe e incumplimentonan relaciona cu e actonan di transmision di propiedad, graba cu e impuestonan ariba ingresonan personal of ariba transmision di bienes y herencia: compra y benta di auto y vivienda, incluyendo intercambionan.
E entidad estatal a adverti cu lo investiga e conceptonan cu ta genera mas incumplimento cu e meta di detecta posibel buraco di evasion, dunando prioridad na e debenan acumula den añanan anterior.
“E destino di e tributonan lo ta un di e temanan cu nos lo enfatisa pa e poblacion conoce cual servicio- y gastonan publico por wordo afecta den e localidadnan si e presupuesto local of nacional no ricibi ingresonan previsto pa concepto di impuesto y contribucion den e cantidad y momento adecua”, ONAT a indica a traves di un comunicado.
E plan ta inclui charlanan cu studiante- y trahadonan di diferente organismonan pa laga nan wak cu nan ta obliga door di ley pa paga nan impuestonan, esunnan cu di acuerdo cu e discurso oficial ta destina pa financia e servicionan publico cu ciudadanonan ta ricibi.
Te na e momento aki no tin datonan oficial ariba e cantidad di placa cu ONAT ta recauda y esun cu a stop di recauda, teniendo na cuenta cu e campaña di declaracion hura pa e personanan natural a cera dia 30 di april cu a pasa.
