Minister di Turismo Otmar Oduber recientemente a realisa un biahe di trabou pa Cuba, unda cu el a topa cu varios representante di organisacionnan cu tin di haber cu turismo. No solamente turismo di Cuba pero di Caribe. E forum cu Minister Otmar Oduber a participa na dje tabata e di 60 edicion di e Conferencia Regional di World Tourismo Organization di Nacionnan Uni.
Ultimo cifranan ta mustra cu e cantidad di turismo den Caribe a aumenta y esaki ta debi na e apertura di e Mercado Cubano. Riba e punto aki Minister Oduber ta bisa cu no por compara Aruba, un isla chikito cu un inventario di 10.000 camber, cu un pais manera Republica Dominicana cu tin 120 mil camber y Cuba cu te awor tin 65 mil camber, mientras cu e cifra aki lo aumenta cu casi 40 mil den e proximo 4 añanan. “E crecemento aki bo no por compare cu Aruba mirando cu e mercado riba cual nos isla ta dirigi riba dje ta uno totalmente diferente.” E mandatario ta splica cu Cuba ta atrae hopi e turista cu ta busca all inclusive of no ta e turista cu ta gasta den e pais. Minister Oduber tabatin e honor di combersa cu Minister di Turismo di Cuba, kende a expresa na su persona cu nan ta desea di haya e turista cu ta gasta den e economia local.
Cuba, cu aworaki a cuminsa traha riba nan sector di turismo, ta enfoca riba e turismo di timeshare pero tambe atrae e turismo di calidad. “Nan ta consciente cu esaki lo tuma hopi tempo. Pesey ta importante e convenionan cu nos ta bay ta firmando cu Cuba,” E mandatario ta indica. Ta trata di convenionan cu ta crea oportunidadnan y por yuda formula e pensamento aki na Aruba si mester sigui den e direccion di All Inclusive.
Minister Otmar Oduber ta haya cu Aruba no mester tin miedo di Cuba, cu ta ricibi mas di 3 miyon bishitante pa aña. Ademas, Aruba a cuminsa un proceso hunto cu Panama y Corsou pa trece e turistanan crucero den e islanan aki cu ta keda mas abou den e parti di Caribe. Door di e ubicacion aki, cu ta un poco mas leu, e barconan crucero no ta mucho interesa pa inclui e islanan aki den nan ruta. Sinembargo ta danki na e bon producto Aruba cu ta ricibiendo casi 700 mil bishitante crucero anualmente. Awor hunto cu Cuba por crea e ruta Zuid, creando atraccionnan unico, unda cu tin un crucero special cu ta bishita 5 destinacion: Colombia, Aruba, Corsou, Cuba y Panama. E turista lo por subi y baha na cualkier di e destinacionnan aki, cu ta un atraccion riba nan mes. “Cuba no ta un menasa pa Aruba. E ta un oportunidad cu nos mester explora pa mira con hunto nos por haci uzo di e hamber tin pa conoce Cuba y inclui nan den e mercadeo agresivo di turismo cu Aruba ta haci riba turista di calidad. Cuba sigur no ta un competencia, pero ta añadi na e producto cu nos ta ofrece ” Oduber a duna di conoce.
Fuente: Comunicado di Gobierno
.jpg "Pa locual ta trato na nos turistanan Un solo caso riba su mes por haci daño na nos economia")
