Diaranson secretario general di Organisacion di Estado Americano (OEA), Luis Almagro, a bisa cu autoridad a nenga su visa pa bay Cuba y asina haya su premio Oswaldo Payá na e isla Cubano.
Almagro a bisa den carta cu a publica riba rednan social, y cu ta dirigi na Rosa Maria Paya, organisador di e premio aki, cu autoridad a nenga su visa den su paspoort pa bay Cuba y a nenga posibilidad tambe di por drenta cu su otro documento di identidad di Uruguay, pa cual no mester ningun tipo di visa”, el a indica.
Diamars cu a pasa ex-presidente di Mexico Felipe Calderon y ex-ministro di Chile, Mariana Alwyn, a denuncia tambe cu autoridad di Cuba no a laga nan drenta na e isla. Ambos tabata bay pa mesun homenahe na honor di disidente politico Cubano cu a fayece caba. Den e carta Almagro ta splica cu un di e funcionarionan di OEA a haya un yamada pa un reunion den consulado di Cuba na Washington, caminda autoridad di Cuba a bisa cu nan ta “sorprendi pa e motibo di bishita di Almagro na Cuba”, y nan a bisa cu no lo dune visa pa Almagro, y cu lo nenga posibilidad pa drenta Cuba, “hasta den caso di purba biaha cu paspoort diplomatico di Uruguay”. Nan a expresa nan sorpresa, ora cu a haya sa cu OEA ta den “actividad anti-Cubano” y cu posibilidad di solicita un visa pa motibo di participa na e actividad ey tabata “un provocacion no aceptabel.”
“E unico interes di nos ta mehora e acercamento di Cuba na balor y principionan di e sistema inter-Americano, den relacion cu defensa di democracia y cu promocion y respet pa derecho humano. Asina tambe interes pa expande logro di Cuba den materia di ciencia, salud y educacion pa e region ey. Almagro a bisa cu autoridad a expresa cu su presencia y actividad ta anti-Cubano, pero esey no ta berdad, ta contrario na e cos cu mi kier pa Cuba, cu tin e posibilidad di logra e maximo nivel di desaroyo y bienestar social pa su pueblo, y cu tur derecho garantisa pa tur ciudadano Cubano.”
