Motorcycle electrico ta ganando mas y mas entre e Cubanonan. Den cayanan di Habana por mira hopi di nan na cualkier momento, de hecho nan a converti den un medio di transporte alternativo, tumando na cuenta e escasez di combustible cu ta surgi di e dependencia di Venezuela pa haya crudo.
Na e capital Cubano por mira e motorcyclenan electrico aki cu ta imita esunnan di careda, incluso ekipa cu speaker pa reproduci musica. Tambe por mira varios di nan cu un capa pa proteccion contra solo.
E Cubanonan ta trece nan na e isla principalmente di Panama y Haiti, unda nan ta costa entre 700 y 800 dollar. Despues di logra e visa necesario, e ciudadanonan di e isla ta biaha pa e paisnan ey pa cumpra motorcycle y ta paga un empresa pa hiba nan Cuba riba barco. E container den cual nan ta yega por tarda seis luna.
Despues di yega Cuba esunnan sin bateria di litio por costa entre 1800 y 2000 CUC, ekivalente na e mesun suma na dollar, mientras cu motorcycle cu bateria di litio ta costa finalmente entre 2500 y 2800 CUC.
Awor gobierno Cubano a tuma e decision pa cuminsa bende e vehiculonan aki den e tiendanan unda ta paga den divisa, un alternativa cu sa mira den practicamente tur pais socialista cu problema di escasez di divisa. Asina gobierno ta crea competencia pa esnan cu ta bay busca motorcycle den exterior y por recauda e dollarnan cu ta saliendo di e pais. Segun publicacion reciente di e medio oficial Cubadebate, lo bay bende e motorcyclenan den e tiendanan estatal ey entre 999 te 1666 dollar. E ciudadanonan por sigui importa semper cu ta pa uso personal.
