E Comision Cubano di Derecho Humano y Reconciliacion Nacional (CCDHRN) a denuncia e notable aumento di detencion arbitrario pa motibo politico na e isla durante luna di februari di e aña aki y a alerta tocante e aumento di persecucion politico contra activista y opositor di e regimen.
Den su informe mensual, publica diarason pasa, CCDHRN a informa cu na februari a tuma lugar 310 aresto, dos biaha mas cu na luna di januari, cu a conoce un total di 144 dtencion.
Den e sentido ey, e grupo opositor ta referi na e realisacion di e referendum constitucional dia 24 di februari cu a provoca un “mobilisacion grandi” di forsanan policial y parapolicial, dedica na eherce “represion preventivo y intimidacion” contra ciudadano clasifica como no liga na, o no simpatisante di e regimen.
Tambe e informe ta duna cuenta di e situacion di e ciudadanonan Yasser Rivero Boni, di Habana, y Salvador Reyes Peña, di Matanzas, kennan a ser aresta na e capital Cubano dia 10 y 16 di februari, respectivamente, y interna den prison di alto seguridad.
Comision Cubano di Derecho Humano y Reconciliacion Nacional tambe a denuncia “48 acto di hostigamento y 12 agresion fisico”, den tur caso tabata trata di accion represivo cu a ser cometi pa polis politico.
CCDHRN ta e unico plataforma cu ta registra e tipo di incidente aki dentro di e isla y, na 2018 so, a conta un total di 2.873 detencion considera arbitrario, casi tur di caracter temporal.
