Cuba ta ricibiendo bastante mas crudo y combustible di Venezuela e luna aki, segun fuente y documento di e compania petrolero cu Reuters a haya pa mira.
Seis barco, mayoria di na propiedad di Pdvsa, a exporta un promedio di 173.000 bari pa dia (bpd) di crudo y combustible Venezolano pa e isla, segun dato di e agencia Refinitiv Eikon y documento di Pdvsa. Na januari exportacion di Pdvsa na su nivel mas abao desde mita di 2019, te 56.600 bpd so.
“Tin mas barco saliendo pa Cuba desde dos siman pasa,” un supervisor maritimo di un haf na parti oriental di Venezuela a bisa. “Nan ta bay y ta bolbe rapidisimo.”
E sancionnan imponi riba Pdvsa na 2019 cu e obhetivo di deroca presidente Maduro, a para e transporte pa Cuba y a contribui grandemente na e escasez di combustible.
E crisis energetico na Cuba a golpea e luna aki industria di sucu, cu dos ingenio (planta di procesa caña) cu a para operacion den temporada halto di cosecha.
Tambe el a provoca filanan largo na stacionnan di servicio, mientras e suministro den parti oriental di e pais tin retraso grandi.
E crisis di combustible na Cuba a afecta siman pasa sector turistico, un di e fuentenan mas importante di divisa pa e pais. E agencianan por a huur auto solamente cu un quota di combustible cu tabata apenas suficiente pa move den Habana mes, aunke despues e situacion a mehora.
Un escasez similar na september a hiba Pdvsa na manda un flotilla cu carga di emergencia di combustible y otro producto refina pa Cuba. Sin embargo, e ayudo tabata di corto duracion ya cu e sancionnan a corta e cantidad di barco disponible pa transporta petroleo di Pdvsa pa Cuba.
Habana a trata di diversifica su importacion den ultimo simannan cu barco cu ta yega di Argentina, Argelia y Curaçao, segun dato di Eikon.
