Mey aña despues cu presidente Donald Trump a tranca e acercamento entre Estadonan Uni y Cuba inicia pa su predecesor Barack Obama pa supuestamente presiona gobierno Cubano pa logra un cambio den e modelo politico di e isla y beneficia e incipiente sector priva, cos ta parce diferente cu loke tabata su intencion.

Segun cifra di gobierno Cubano na cual Associated Press tabatin acceso, na 2017 a registra un record di 4,7 miyon bishitante un incremento di 18% compara cu 2016, y a drenta mas di 3.000 miyon dollar via turismo, di cual e mayoria a bay pa sector estatal.

Sin embargo, e propietarionan di restaurant y alohamento priva a reporta caida fuerte den nan negoshi. E estadisticonan ta indica cu solamente 34% di e turistanan sin specifica nacionalidad ta keda den e 24.000 cambernan priva cu e pais tin registra.

Rodolfo Morales a ricibi como seis yamada di telefon diariamente entre september y october 2016. Tur tabata di turista Europeo y Mericano ansioso pa reserva un di e dos cambernan cu e ta huur na su cas na un banda di e bahia di Habana, pero den e mesun periodo di 2017 e no a ricibi ni un solo bishitante.

“Cu e anuncionan di acercamento di presidente Obama tabatin un explosion di turista. Tur caminda bo tabata mira nan”, Morales a conta AP, cu ta un pensionado cu ta completa su pension cu e huur di camber. Nos tabata colabora entre bisiña pa por acomoda asina hopi hende. Despues, esey a caba.”

Tempo cu Trump a hala e medidanan di Obama atras, el a impone e condicion cu nan mester biaha den grupo. Ya cu Cuba ta canalisa e turistanan cu ta contrata tournan via entidadnan estatal, nan tabata bay aloha mas den e hotelnan reconoci.

No ta e politica di Trump so a afecta e sector priva di turismo. Autoridadnan local a anuncia na augustus 2017 un vriesmento di licencia nobo pa restaurant y alohamento, cu e argumento cu tabatin mester di mas control contra evasion fiscal y compra di cosnan horta di estado.

Segun expertonan consulta pa AP, e cifra di turista internacional na e isla a crece cu 56% entre 2014, cu 3 miyon, y 2017 ora a yega na 4,7 miyon. E fluho di turista Mericano no a bira menos tampoco, a pesar di Trump. Segun embahada di Cuba na Merca, na 2017 a bishita Cuba 619.000 Mericano y 453.000 Cubano Americano, un contraste cu e 91.000 Mericano y 361.000 Cubano Americano cu a yega na 2014.

Ademas a habri un mercado nobo na Cuba pa turismo crucero, cu no tin molester di e medidanan di Trump. Te cu 10 di december 2017 a yega 541.000 turista crucero compara cu 184.000 na 2016. Cuba ta opera actualmente 382 hotel, 88 di nan ta administra pa 20 cadena internacional di reputacion manera Meliá y Barceló.