Cuba: Lo bay reconoce propiedad priva pero ta mantene estado socialista

(Infobae/LaOpinion) – Cuba lo bay reconoce e papel di mercado y propiedad priva den su modelo di maneho economico di estilo sovietico, pero lo mantene e irevocabilidad di estado socialista, asina prensa lo9cal a informa diasabra pasa, cu a revela pa prome biaha detayenan di un proyecto pa un constitucion nobo cu lo bay goberna e pais.

E debate riba e propuesta di reforma di e constitucion Cubano lo bay ta un di esun mas spera pa proximo diasabra, den un sesion di Asamblea Nacional cu lo bay anuncia ademas e restructuracion di un gabinete di ministro nobo, cu lo bay acompaña presidente Miguel Diaz-Canel pa e proximo 5 aña.

“E sistema economico ta mantene como principio esencial e propiedad socialista di henter pueblo, na cual ta añadi e reconocimento di e papel di mercado y formanan nobo di propiedad, entre nan esun priva,” Granma, organo oficial di partido comunista, a bisa den un articulo titula “Vision pa presente y futuro di Patria”.

E economia di Cuba tabatin problema cu su crecemento, debi na, den e ultimo periodo, e recorte di subsidio di su aliado Venezolano, e crecemento reduci pa e embargo nobo di Merca cu Trump, y varios horcan cu a castiga e isla den ultimo aña.

E hefe di partido comunista di Cuba, Raul Castro, ta lidera un comision cu ta prepara un documento cu ta purba actualisa e carta magna, cu ta di 1976, durante e guera friu, aunke el a ser modifica na 2002 pa decreta socialismo como “irevocabel” na e isla.

E ex-presidente Castro di 87 aña, a anuncia pa prome biaha e necesidad di modifica e Constitucion na 2011, despues di enfoca riba un serie di reforma economico di apertura pa inversion stranhero y pa empresa priva chikito, cu a inicia durante su mandato di 10 aña cu a finalisa na april.

Actualmente ta inscribi como ‘cuentapropista’ 591.456 persona di acuerdo cu dato oficial, cu ta aumenta cu cerca di 13% e forsa laboral di e pais, desde cu Castro a inicia su plan di reforma na 2010.

Granma a revela cu e proyecto ta apunta pa crea un puesto nobo di prome ministro, cu ta separa e papel di hefe di gobierno y hefe di estado.
E corant ademas a afirma cu lo ta bay mantene e derechonan pa libertad religioso y lo bay inclui pa prome biaha e no discriminacion pa identidad di genero, un reclamo cu a ser e impulso pa Mariela Castro, yiu muhe di Raul y director di e Centro Nacional di Educacion Sexual.