E noticia di 933 tonelada di medicamento cu gobierno Cubano y Chines a duna gobierno Venezolano a provoca indignacion den poblacion. E medida ta tuma lugar na menos di un luna di un tornado ( 27 di januari) cu a devasta varis bario pober y densamente pobla di e capital Cubano.
Sinembargo, ni sikiera na e ocasion ey gobierno a duna ayudo humanitario. Manera semper, alimento y material necesario pa haci reparacion na vivienda a ser bendi. Y no esey so, tambe a prohibi y impedi personanan di duna ayudo humanitario na esnan afecta di forma independiene.
E canciyer Venezolano, Jorge Arreaza, a declara cu na su pais no ta existi ningun crisis humanitario. A scucha via Telesur mas di un funcionario, entre nan e propio Nicolas Maduro, reitera cu na Venezuela no tin escasez. Si e declaracionnan aki ta berdad, pakico nan mester ayudo? Pakico no inverti e recursonan ey pa alivia e crisis di medicamento cu e poblacion Cubano ta sufri? “E gobierno aki ta oprimi y abusa die e pueblo aki manera e ta haya ta bon?” un conoci a reacciona. “Como cu nan no tin di duna cuenta, nan mes ta pone y kita hende, nan ta kere cu nan por dispone di e bienes di e pais manera ta nan propiedad.”
“Kico ta bal nos scucha un y mas biaha cu Cuba tin e cifra mas halto di medico di historia, si no tin medicina pa receta?” un enfermera a comenta. Aunke prensa ta divulga cu mas di dos tercio di e medicamentonan ta elabora na e pais, ta depende di materia prima importa, cu no ta haya semper, pa instabilidad di mercado, falta di credito como tambe falta di financiamento den produccion.
Pa motibo di e falta di abastecimento pa hopi aña, e poblacion ta acudi na medicina natural y tradicional, sin recept. Pero hasta e remedinan ey a desaparece di e shelfnan di botica, ta bisa pasobra nan no ta paga e productornan.
