(CiberCuba) – E organisacion no gubernamental (ONG) Human Rights Watch (HRW) a exigi gobierno Cubano e liberacion di opositor y preso politico Jose Daniel Ferrer Garcia, ken ta deteni desde dia 11 di juli 2021 y cu tin cerca di 20 dia incomunica na e prison di Mar Verde, na Santiago de Cuba.
“Na Cuba, e lider opositor Jose Daniel Ferrer ta cera desde 11 di juli 2021. Ya ta 20 dia cu su famia no por comunica cune. Su detencion ta arbitrario. Nos ta exigi su liberacion y respet pa su derechonan” e investigador Juan Pappier, di e division di America di HRW, a skirbi ariba su cuenta di Twitter.
Dia 18 di juli e famia di e opositor y preso politico a denuncia cu nan tabatin 14 dia sin tin noticia di dje, pues e regimen Cubano ta prohibi e opositor di realisa yamadanan telefonico for di e prison caminda e ta wordo reteni arbitrariamente.
“Dos siman sin sak’e pa e cinco miserabel minuutnan di yamada telefonico cu e tiranonan cu poder ta determina na dun’e”, Ana Belkis Ferrer Garcia, ruman di e lider di e Union Patriotico di Cuba (UNPACU), a skirbi ariba Facebook.
Apenas cuater dia pasa e familiarnan di e opositor a haya nan mes obliga pa exigi na e regimen un prueba di bida, pues e dianan di falta di contacto cu nan a extende.
E propio opositor a duna detayenan ariba e agresionnan den su contra, despues di permanece 45 dia sin comunicacion. Durante un bishita cu su familiarnan a pidi realisa na e prison, Ferrer Garcia a sigura cu e ta sufri di dolornan di cabes hopi fuerte, horeanan tapa, perdida di bista, sangramento di boca, alergia na cuero y problemanan gastrico.
Ademas di Human Rights Watch, otro organisacionnan internacional y gobiernonan manera esun di Merca a demostra ariba diferente plataformanan digital nan preocupacionnan pa e lider opositor, ken su salud a deteriora significantemente den prison, door di no ricibi atencion medico di parti di e regimen.
