(CiberCuba) – Gobierno Cubano a reconoce durante su reunion mensual di Conseho di Minister cu e prijsnan nobo di combustible, cu a drenta na vigor dia 1 di maart, no a logra e efecto cu nan tabata spera, specialmente relaciona na e oferta di e transportadornan priva.

Den e evaluacion cu e alto dirigentenan Cubano a haci, vice-prome minister di Economia y Planificacion, Mildrey Granadillo de la Torre, a sigura cu prijs a sigui aumenta den loke ta trata transport di e poblacion, culpando e aumento ey riba e formanan priva.

E funcionario a bisa specificamente cu a pesar cu e formanan di gestion no estatal cu ta brinda servicionan di transport di pasahero y di carga ta adkiri e combustible pa ehercicio di e actividadnan ey na prijsnan mayorista estableci, nan no a logra e efecto spera den e prijs, segun un reportahe di corant oficialista Granma ta indica.

Desde cu e tarifanan nobo a drenta na vigor, cual ta bay wordo someti na un revision cada tres luna, e regimen a bay den alerta pa miedo di un aumento di prijs den e sector di transport priva, consciente cu un hecho asina por tin efecto riba e circunstancianan delicado di mobilidad na henter e isla.

Entre su tacticanan, aparentemente ineficiente, a surgi e imposicion di boet na transportadornan manera cu a sucede na Guantanamo, unda den menos di un siman, inspectornan a pone 80 sancion na chauffeurnan cu a comete ilegalidadnan, segun un nota di corant oficialista Venceremos.

Otro di su alternativanan ta e charlanan preventivo a traves di Conseho di Administracion Publico, di Oficina Nacional di Inspeccion Estatal di Transport, di Direccion Integral di Supervision, hunto cu Polis Nacional Revolucionario, pa nan organisa y combati prijsnan abusivo den sector di transport di pasahero.

E berdad ta cu dilanti un panorama di escasez cu ta sigui crece, autoridadnan ta sigui sin haya un formula cu no tin e poblacion como esnan mas afecta den e decisionnan cu ta wordo tuma for di un bureau den Palacio de la Revolucion, cuestion cu ta impacta negativamente den e calidad di bida di e Cubanonan.

Defendiendo e medidanan aki den e orden di combustible, prome minister Manuel Marrero Cruz a bisa, entre otro cuestionnan, cu e aumento di prijs pa e poblacion di parti di e transportadornan priva ta un distorsion cu mester wordo coregi.

Marrero Cruz a haci un enfasis riba e responsabilidad di e gobiernonan local pa haci cumpli loke ta estableci y a lansa menasanan hopi concreto cu ta haci e panorama mas agudo.