Gobierno Cubano a impedi siman pasa e biahe pa exterior di cuatro activista defensor di derecho humano cu tabatin planifica pa participa na un evento internacional na Lima, Peru.
Kirenia Flores Garcia y Ivan Torres Reyes, miembro di e plataforma Juventud Activa Cuba Unida (JACU); Zaray Fernandez, di Cuba Independiente y Democratica (CID), y Eduardo Velazquez, di movimento ecosocial ProNaten, tabatin pasashi reserva pa bula dia 10, 11 y 12 di december, algun cu aerolinea Latam y otro cu Copa.
Sin embargo, ora nan a yega Aeropuerto Internacional Jose Marti, di Habana, e funcionarionan di Inmigracion a confirma nan cu nan no por a aborda nan vuelo pasobra nan nombernan ta aparece riba e lista di persona sanciona pa “interes publico.”
“Esaki ta e di dos biaha cu sin motibo y sin splicacion a impedi nos, ami y Kirenia di sali di e pais. Nos tin nos papelnan regla, no tin nada cu legalmente ta impedi nos biaha,” Ivan Torres a comenta na Cubanet.
E activista a referi na november pasa ora e y su compañera a keda prohibi pa bula pa Quito, Ecuador, unda nan lo a participa na e di 174 Periodo di Sesion di Comision Interamericano di Derecho Humano.
Na e ocasion aki, e cuatro hobennan lo a asisti na e di XII edicion di Universidad de la Libertad (UDL), un evento dirigi na promove participacion y liderazgo di hoben comprometi cu democracia na America Latino, realisa dia 13 y 14 di december na Lima.
