(CiberCuba) – Como parti di e pakete di disposicionnan normativo nobo pa actornan no estatal di e economia, e regimen Cubano a anuncia cu e ta bay exigi garantia di e ministerionan di Educacion y Salud Publico pa tur persona cu ta cobra pa cuido di mucha y adulto mayor.
Den un conferencia di prensa a traves di e canal oficialista Canal Caribe, Ariel Fonseca Quesada, director general di empleo di e Ministerio di Trabou y Seguridad Social, a sigura cu e actornan aki mester tin un garantia pa certifica cu nan ta capacita pa realisa e tareanan aki.
E entrada na vigor ta premira pa dia 19 di september y segun e plataforma di television riba Facebook, ta trata di un proceso diseña di un manera gradual cu ta responde no solamente na e preocupacionnan di e poblacion, pero tambe na loke a wordo estableci na momento cu a crea e companianan micro, chikito y mediano.
Di mesun manera, el a expone cu e medida ta integra un grupo di proyeccion pa coregi e distorsionnan y reimpulsa e economia y ratifica e actualisacion di e disposicionnan huridico cu ta regula e actornan economico no estatal.
Segun Cubadebate, e pakete di medidanan ta busca reorganisa resolucionnan cu ta referi na e procedementonan pa e creacion, fusion, desunion y extincion, aspectonan di e contrato economico y procedemento di oferta den relacion di entidadnan estatal cu actornan economico no estatal, y e normanan pa e recaudacion y e tratamento di prijs y tarifanan pa e trahadonan cu ta traha riba nan mes.
E adaptacionnan tin como obhetivo, ademas, consolida e aplicacion di e tributonan bou di e principionan di generalidad y equidad tributario, como tambe impulsa e capacitacion economico di cada contribuyente.
Tur loke a wordo exponi anteriormente e regimen Cubano a informa den un actualisacion nobo di e Gaceta Oficial, publica dia 19 di augustus.
