(CiberCuba) – Ministerio di Finanzas y Prijs di Cuba a aproba un resolucion cu ta permiti e benta di tereno na e pais na empresanan stranhero pa impulsa e desaroyo di energia renobable.
E medida, publica riba e Gaceta Oficial, ta establece un balor minimo di 34 cen di dollar pa meter cuadra di tereno destina na proyectonan di energia eolico y solar.
E resolucion 271/2023 ta recalca e consideracion di derechonan di propiedad ariba bienes inmuebles pa inversionnan stranhero desde un norma previo di e Ministerio na 2012.
Di mesun manera, e ta establece cu e balornan minimo aki lo sirbi como referencia pa determina e balor di e suela den cada proyecto of negociacion, coregi pa coeficientenan segun e tipo di derecho di propiedad, sea e ta superficie of pa ganashi y su tempo di vigencia.
Segun e calculacion realisa pa e medio independiente Diario de Cuba, e balor di e tereno stipula na Cuba ta supera e standardnan internacional. Por ehemplo, den comparacion cu Spaña, unda e terenonan pa proyectonan di energia solar tin un balor anual di entre 1.500 pa 1.600 euro pa hectar, e balor minimo na Cuba ta ekivalente na alrededor di 3.400 dollar pa hectar.
A pesar di e esfuersonan di e gobierno di e continuidad pa aumenta e participacion di energianan limpi den e fuentenan energetico Cubano, actualmente, esakinan ta representa solamente 5% di e consumo total di e pais.
E Resolucion 271/2023 no ta contempla e posibilidad di cu e inversionnan ta bini di capital nacional, y a drenta na vigor cu su publicacion riba e Gaceta Oficial.
