Fiscalia Cubano a pidi 9 aña di prizon pa activista anti-Castrista Jose Daniel Ferrer, coordinador general di e organisacion opositor Union Patriotico di Cuba (UNPACU), acusa di causa “lesiones graves”.
Nelva Ortega, esposa di Ferrer, a bay bishita Ferrer diahuebs pasa hunto cu su yiunan menor di edad y aya a haya entrega un documento cu tabata contene e exigencia di Fiscalia.
Ferrer, cu te na e momento ey tabatin 108 dia den prizon, a stop di come den prizon pa exigi cu ta mehora e cuminda cu e presonan ta haya. Segun su esposa ta mantene Ferrer den cel di castigo y den isolacion. Tambe lo ta nenga di duna Ferrer e medicamento cu e mester, segun su esposa.
“Nos ta mir’e bastante delega, mas cu e biaha anterior pues e no ta comiendo, e ta nenga di come. E ta exigiendo cu ta mehora alimentacion pa preso en general. E ta tuma diariamente un glas di lechi, awa y crackers,” el a agrega.
Pa Fernando Gonzalez Vaillan y Roilan Zarraga Ferrer, tambe miembro di UNPACU, Fiscalia a pidi 7 aña, y pa Jose Pupo Chaveco, 8 aña.
Abogado di Ferrer a splica e medio Cubanet cu e acusacion ta yen di incongruencia y eror. Por ehemplo ta causa Ferrer di delito di “lesiones graves” (causa na otro persona), sin cu ta specifica e articulo di Codigo Penal, ni ta specifica mas aleu di kico e delito ta consisti.
