Cuba a registra pa fin di 2016 un deficit di mas di 880,000 vivienda den henter e pais, unda tin 3,8 miyon hogar, un fondo habitacional por lo general deteriora y cu  problema “critico” den centronan urbano manera La Habana y Santiago de Cuba.

Entre e principal causanan di e problema aki tin e “perdida di capacidad habitacional debi na e deterioro di e edificionan,” cu pa mayoria tin mas di 30 aña, asina directora general di Vivienda di Ministerio di Construccion, Vivian Rodríguez, ta declara den medionan oficial di e isla.

Den un informe pa e comisionnan di e Asamblea Nacional (parlamento di un solo camara), cu ta reuni na La Habana, sin acceso pa prensa di exterior, Rodríguez a señala “problema critico” den algun di e zonanan cu mayor densidad poblacional.

Segun dato oficial, e capital Cubano tin un deficit di 206.000 vivienda, e provincia di Camagüey a registra un falta di 71.000 hogar, mientras cu e provincianan oriental Holguín y Santiago de Cuba ta esunnan mas afecta despues di la Habana, cu 147.000 y 103.000, respectivamente.

E funcionario a splica cu e programa di terminacion di vivienda pa 2017 “ta presenta atraso, pues di un plan di 9.700 cas a termina solamente 5,722”.

Encuanto subsidio pa restauracion di vivienda y construccion di “unidad basico habitacional,” e responsable di Vivienda a precisa cu a completa 56.235 expediente di 107,981 caso aproba pa e aña aki.

Gobierno Cubano a destina mas di 3.000 miyon peso Cubano (como US$120 miyon) desde cu e programa di subsidio a cuminsa na 2012, di cual a keda ehecuta te cu 2016, poco mas di 70% di e total, segun cifranan oficial.

Bishita di e diputadonan na 120 municipio di e pais a demostra cu “ta prevalece retraso den cumplimento di e e cronograma di ehecucion, mal preparacion di e obranan, retraso den entrega di urbanisacionnan y un control deficiente di calidad durante e proceso di construccion,” e nota ta bisa.

Ademas, otro informe presenta na e comision, a refleha “e insuficiente control den e tiendanan di material di construccion y e lentitud den duna respuesta na e tramitenan di e poblacion.”

En vista di e problema, Cuba ta proyecta un strategia a mediano plazo pa mehora su fondo habitacional, apoya pa e incremento di produccion local di material, aumento di capacidad di construccion y introduccion di tecnologia nobo.

Vivienda ta un di e principal problemanan social di Cuba, y na 2014  como 40% di su mas di tres miyon vivienda tabata den mal estado.

Desde tres aña pasa te awor, e deficit general a aumenta cu 200,000 vivienda; apesar cu gobierno a habri na 2010 e concesion di licencia di construccion y a libera benta di material, ademas di impulsa un plan di credito y subsidio.

Na november di 2011 a duna luz berde pa compra di vivienda entre persona particular, un posibilidad cu tabata prohibi durante decada y cu tabata un di e medidanan mas popular di e plan di reforma di gobernante Raúl Castro, pa “actualisa” e modelo economico socialista di e  isla.

Na februari ultimo gobierno a anuncia regulacion nobo pa e sector, cu den actualidad a yega na prijsnan fuera di alcance di e Cubano di averahe, cu awor por haya cas cu no ta acaba, o legalisa vivienda construi sin documentacion estableci.

Dentro di e normanan ta destaca e benta “di un vez so” di 16.887 vivienda social den ehecucion na ciudadanonan di e isla, cu por paga e valor di transferencia di e inmueble y mester termina nan dentro di cinco aña, periodo den cual mester drecha y legalisa e vivienda.