Un derumbe nobo a tuma lugar diahuebs pasa den e parti historico di Habana, un di e tesoronan di edificio monumental den Caribe. Un edificio situa na squina di Calle Galiano y calle San Lazaro, den municipio Centro Habana, a habri for di otro, lagando parti d epromer piso como tambe e segundo piso exponi.
E fotonan publica pa e usuario riba su cuenta di Twitter, identifica como Liborio na Cuba, ta mustra e escombro riba caya. “Cuba ta cay na pida,” el a expresa. E activista politico Orlando Reyes tambe a post varios imagen riba su cuenta di Facebook.
Den e comentarionan riba e publicacionnan haci ta lamenta e suceso, cu ta un muestra di e decadencia material den cual e ciudad historico ta.
“Lastima, e edificio riba su mes ta un obra arquitectonico”; “Y laga dos o tres awasero mas cay. Habana ta cay for di otro manera un polvoron”; “Asina e mentiranan di gobierno di Cuba ta, nan ta cay nan so“; “Hasta cuando?… y asina nan ta sigui construi hotel di luho nobo” y tambe “Lastima cu e no ta haci niun hende dolor. E tirania ey ta bisa cu nan tin cos mas importante pa cual preocupa“, tabata algun di e criticanan riba rednan social.
Apesar cu centro di Habana a keda declara patrimonio internacional pa Unesco varios decada pasa,e deterioro di su edificionan tanto priva como di estado, ta palpable.
Despues di varios aña di despreocupacion di parti di autoridadnan, hopi edificio cu hopi aña atras tabata luci nan esplendor artistico y constructivo, awor ta berdadero ruina insalvable. E problema ta cu den hopi di nan ainda tin hende ta biba cu e riesgo constante di muri aplasta, mientras gobierno Castrista ta preocupa solamente cu construi hotel nobo.
