Compania petrolero ExxonMobil a demanda diabierna pasa na Merca e estatal Cuba-Petroleo (Cupet) y e grupo empresarial Cimex, pa e nacionalisacion di e gobierno di Fidel Castro, segun documento oficial.
ExxonMobil ta acusa e companianan Cubano di ‘trafico ilegal di propiedadnan confisca’ despues di e revolucion di 1959, na virtud di e Titulo 3 di e Ley Helms-Burton di 1996 y cu e administracion di Trump a pone na vigor diahuebs pasa.
E demanda, cu a ser presenta na e Tribunal di Districto di Columbia, ta reclama e reparacion pa e usufructo di un refineria, stacion di servicio y otro activo.
E documento a ser publica riba e pagina di internet di e Conseho Economico y Comercial Cuba-Merca, un organisacion cu sede na New York.
Actualmente, e refineria ta opera pa Cupet, mientras cu e grupo empresarial Cimex di capital estatal Cubano y e mayor di su tipo na e pais, ta maneha stacionnan di servicio na tur e isla.
Diahuebs, e compania di crucero Carnival a converti den e prome compania demanda na tribunal di Merca pa uzo di e waf di La Habana y Santiago di Cuba.
E norma cu e presidente Donald Trump a pone na vigor, ta permiti pa Mericano y Cubano-Mericano demanda na tribunal di Merca e empresanan cu a obtene beneficio pa via di e companianan cu a ser nacionalisa despues di 1959.
