Aunke escasez di cierto producto ta parce un elemento cu no ta falta den ningun sistema socialista, na Cuba e temponan grave di añanan 90 ta bolbiendo. Para oranan largo den rij cu e posibilidad di keda man bashi a bira parti di e bida diario di e ciudadano Cubano.
E actriz y activista independiente Cubano, Lynn Cruz a denuncia e tragedia diario di e rijnan largo na Habana unda nan ta tuma 100 turno mientras tabatin solamente 80 porcion di galiña disponible. Ademas na banda di e tienda un persona, e guardia di turno, tabata bende ticket.
“Pa 8:55 am a sali un muher di e tienda pa splica cu e lo duna 100 turno so. Hopi hende tabata warda desde cinc’or di marduga y nan a cuminsa denuncia e situacion,” segun Cruz riba Facebook. Cruz y su suegra, cu a sali promer cu siet’or pa para den rij di un tienda cerca di su cas, a bin haya e rij doblando squina caba.”
A pesar cu como binti persona a denuncia na polis e rebenta di turno pa e guardia na banda, e polisnan a pidi pa entrega prueba. Ora e hendenan a cuminsa mustra riba un muher cu blusa geel, polis aignora e protesta. “E guardia finalmente a haya un empleo cu si ta dun’e di come debi na su salario miserable y esey ta di bende ticket,” el a señala. Segun e actriz e mesun rutina ta ripiti tur dia.
Ironicamente e galiña pa suministra na pueblo Cubano ta bin pa gran parti di ‘enemigo’ Estadonan Uni, y a conoce un aumento na april compara cu e lunanan anterior. E luna ey a importa mas di 16.000 ton di galiña, segun dato di United States Department of Agriculture (USDA).
