Un medicamento cu ta yuda preveni HIV na persona cu no tin e virus a cuminsa introduci na Cuba, specificamente na e municipio Matancero di Cardenas, e corant Granma a informa.
Pre-Exposure Prophylaxis (PrEP) , por reduci den mas di 90% e riesgo di wordo contagia entre personanan cu ta exponi pa e enfermedad, semper cu nan tuma e pildo tur dia.
Niura Pérez Castro, hefe di e programa di prevencion de ITS/VIH/SIDA y hepatitis na e teritorio, a revela cu a cuminsa duna e pildo na personanan cu posibilidad halto di contagia e virus, pa via di nan conducta di riesgo, di manera gratis.
E plan piloto a inicia dia 6 di maart ultimo, y na e momento aki, e consumo di e pildo a wordo aproba pa 28 persona, kende ta ahusta na e rekisitonan di e programa.
“Ta trata di un proyecto conhunto cu e Organisacion Panamericano di Salud, y cu na Cuba ta bin pa complementa e esfuerso durante aña pa e prevencion di e infeccion. Nos lo considera como un terapia combina cu e obhetivo esencial di cambia e comportacion di riesgo”, e experto a bisa.
Aunke e medicamento a ser balora como eficazmente halto, Perez Castro a recomenda no descarta e uzo di condom como forma mas sigur pa evita e infeccion.
Na Cuba, cada aña ta diagnostica 2.000 persona cu HIV. E pais a compromete pa cumpli e obhetivo di e Programa Conhunto cu Nacionnan Uni riba e enfermedad, y a adopta e strategia conoci como 90-90-90, cu ta espera alcansa logro importante na 2020.
