(CiberCuba) – Gobernante Cubano, Miguel Diaz-Canel a reuni durante weekend cu e representante special di Union Europeo pa Derechonan Humano, Eamon Gilmore, ken el a ricibi na e Palacio de la Revolucion na fin di e jornada di trabao di e funcionario Europeo na La Habana.
E reunion cu e gobernante a pone punto final na e bishita di e funcionario Europeo, memey di e incertidumbre di sociedad civil Cubano tocante si a atende nan reclamonan insistente tocante e situacion di e mas di mil preso politico di e regimen y nan familiarnan.
Diabierna, Gilmore a reuni cu autoridadnan di regimen Cubano y supuesto “actornan di sociedad civil” na e sede di Asociacion Cubano di Nacionnan Uni (ACNU) unda el a keda ricibi pa su presidente, Norma Goicoechea Estenoz, kende tabata embahador di Cuba na Union Europeo.
E diplomatico di e regimen, cu ta defini riba rednan social como “mama, wela y revolucionario” y kende ta afirma cu “Fidel y Marti a siña nos cu un mundo miho ta posible,” a presidi un reunion cu presunto actornan di sociedad civil Cubano, cu a tuma lugar den un sala rondona di cartelnan propagandistico di revolucion y un potret grandi di Fidel Castro.
Na momento di e relato no tabata conoci si e representante pa Derechonan Humano di e bloc Europeo a bishita algun di e mas di mil preso politico di e dictadura of nan familiarnan, manera e integrantenan di sociedad civil Cubano, opositor y un mayoria di parlamentario Europeo a exigi na Union Europeo,
“Eamon Gilmore a biaha na La Habana pa participa den e di IV Dialogo di Derechonan Humano entre Cuba y Union Europeo. E intercambionan aki ta den marco di Acuerdo di Dialogo Politico y Cooperacion entre Cuba y UE (ACDP). Na clausura di su bishita, e ta ricibi pa Diaz-Canel,” e presidencia a splica riba X.
E bishita di Gilmore ta bay sirbi pa “analisa e situacion crea prome, durante y despues di e manifestacion- y detencionnan” di 11J, segun Alto Representante Josep Borrell a bisa na mei, durante su bishita na La Habana. Sinembargo, te awe su enviado no a ni menciona e protestanan historico di 11J of e centenares di manifestante cu ta keda den prison.
Un biaha mas e expectativanan di tur activista, opositor y periodista independiente Cubano ta keda aparentemente relega den e entramado di relacionnan cu UE ta pretende di construi cu e regimen Cubano a traves di ACDP, cu ta inclui e realisacion di dialogo riba temanan di derechonan humano, manera esun cu a co-presidi cu Gilmore. “Hopi bon, finalmente un persona ta bay papia di derechonan humano cu esun cu a duna orden pa suta pueblo!” un usuario Cubano a contesta e presidencia riba rednan social, expresando e sentimento mayoritario di sociedad civil Cubano.
