Na municipio Calimete, Matanzas, a sucede un derame di 268.000 litro di fuel oil, den cercania di e central di sucu Jesus Rabi. Segun un nota publica den e corant gubernamental Granma e situacion ta bao control y actualmente ta traha riba recoge mayor parti di e petroleo.
E incidente ta tuma lugar diasabra pasa den oranan di atardi y e causa tabata un fayo den un deposito di combustible cu ta suministra na e destileria situa cerca di e centro procesador di caña di sucu.
E hecho a keda confirma tambe pa e ciudadano Aida Sotolongo, cu a reporta e suceso riba su cuenta di Facebook. Den un video ta aparece Orlando Vandrel Cuello, director di Desaroyo y Inversion di e empresa Azcuba na Matanzas, cu a splica cu e derame a ser causa pa un valve defecto.
Eric Minoldi Perez, director di Unidad Empresarial de Base (UEB) Azumat, a notifica cu den e prome 24 ora forsanan specialisa a logra recupera cerca di 135.000 litro.
E producto recupera ta bay pa varios refineria pa reusa e material, cu pa gran parti no a perde su calidad, segun Perez.
Loke keda na material lo ser mezcla cu piedra pa usa despues den construccion di caminda di acceso na e plantacionnan di caña. E funcionarionan oficial no ta anticipa daño na medio ambiente ni tampoco na e areanan di agricultura den e zona.
