Cuba tin un actual deficit di 20mil bari pa dia di petroleo, cu ta obliga nan pa cumpra riba mercado internacional pa tin un sosten na e consumo, calcula na 130mil bari pa dia, segun Jorge Piñon, director di programa di energia pa Latino America di e Universidad di Austin, na Texas.
E sancion cu a ser imponi di Merca pa Venezuela, cu ta inclui e envio di petroleo pa Cuba tambe, ta aumenta mesora e posibilidad di escasez na e isla, y e crisis economico Venezolano lo por bira mas intenso. Segun e Oficina di Control di Activo Stranhero di e Departamento di Tesoro (OFAC), e sancion pa PDVSA cu ta prohibi e importacion di crudo Venezolano pa Merca ta drenta na vigor dia 28 di april proximo.
Piñon, un experto na asuntonan petrolero cu trinta aña di experiencia, tabata presidente di Amoco Oil di Mexico y di Amoco Oil pa Latino America. El a sigura cu Venezuela te ainda ta manda pa Cuba 60mil bari pa dia di crudo, cu ta suma na e produccion nacional di 50 bari pa dia.
Di su banda, dia 20 di februari, Rodrigo Malmierca Díaz, minister di Comercio y Inversion Stranhero, a biaha pa Argelia den busca di aumento di envio di petroleo enfrente e crisis Venezolano, cu ta echo riba e isla cu ta depende riba crudo Venezolano.
Cuba y Argelia a firma un acuerdo cu ta contempla e suministro di hidrocarburo pa e isla desde 2019 te 2021, a cambio di abastecemento di crudo, cual ta encarga e grupo Argelino Saidal. Cuba ta ofrece tecnologia na materia di farmacologia a traves di e empresa Cubano Biopharma, segun e minister Argelino di Salud, Poblacion y Reforma hospitalario, Mokhtar Hasbellaoui a bisa.
