Al menos dos compania internacional vincula na proyecto di transporte y infrastructura aereo a cancela e contratonan estableci cu Cuba, pa temor di sancionnan di Estadonan Uni den refuerso di e embargo.
Durante un intervencion siman pasa den e programa gubernamental Mesa Redonda di television Cubano, ministro di Transporte, Eduardo Rodriguez Davila, a menciona cu al menos dos empresa a kibra nan convenio, pa cual e proyectonan di remodelacion di e aeropuertonan di e isla y di compra di dos avion pa Cubana de Aviacion a keda afecta.
E titular di transporte a culpa e campaña di presion di gobierno Mericano contra economia Cubano pa hustifica e problemanan cu transporte publico ta enfrenta na e pais.
Aunke e no a revela nomber di e empresanan, tur cos ta indica cu ta trata di e firmanan Frnaces Bouygues y Avions de Transport Regional.
Na augustus 2016 Bouygues y Aeropuertonan di Paris a logra un concesion di gobierno Cubano pa amplia y maneha aeropuerto di Habana y e aeropuerto di San Antonio de los Baños, pero ta parce cu e obranan nunca a cuminsa.
Rodriguez Davila a detaya cu e otro compania a cancela benta di dos avion cu Cuba tabatin casi cumpra pa destina na vuelo nacional. Juli aña pasa a revela cu Cubana de Aviacion a yega na un convenio cu e consorcio Italiano-Frances Avions de Tranport Regional pa cumpra dos avion di modelo ATR 72-600, e prome avionnan cumpra na Europa den 17 aña, na un balor di 50 miyon euro.
Na october pasa Buro di Industria y Seguridad di Departamento di Comercio di Merca a reduci di 25 te 10 porciento e proporcion di piesa di origen Mericano den producto cu cualkier empresa por bende cu Cuba.
