Comercio bilateral entre Cuba y Brasil a yega na e nivel mas abao den ultimo 12 aña, cu un reduccion di 30% desde yegada di Jair Bolsonaro na poder. Cifranan oficial di ministerio di economia di Brasil ta mustra e deterioro di comercio entre ambos pais durante 2019.
Na final di e prome aña di gobierno di Bolsonaro,exportacion Brasileño pa Cuba a keda limita na 265 miyon dollar, 23% menos cu na 2018 y leu di e mas di 450 miyon dollar cu tabata promedio di benta na Cuba den ultimo decada, cu gobierno di Lula da Silva y Dilma Rousseff.
Exportacion di Cuba pa Brasil a cay mas fuerte ainda. E economia insular a exporta pa Brasil pa solamente 8,5 miyon dollar, 75% menos cu 2018, unda ainda a exporta 33,75 miyon dollar na producto.
Di acuerdo cu estadistica Brasileño, mas di mita di e exportacion Cubano tabata consisti di producto semifactura di hero y staal.
Gran parti di e importacion Cubano di Brasil ta concentra den alimento, principalmente producto basico no procesa. Carni di galiña, soya, maishi na grano, aros integral y procesa, entre otro, en total mas di 60% di loke Brasil ta exporta pa Cuba.
E reduccion di comercio entre Cuba y Brasil ta coincidi cu yegada na poder di Jair Bolsonaro, ultraderechista y fuerte critico di e regimen Cubano. Bolsonaro a cambia rumbo di relacion cu paisnan manera Cuba, Venezuela, Bolivia y Angola. Na 2019 a yega un fin tambe di e convenio di personal medico Cubano na Brasil, cu tabata duna Cuba cerca di 350 miyon dollar pa aña.
Cuba no ta logra tampoco cumpli cu pago di debe cu tin cu Brasil. Entre otro Cuba a keda sin cumpli mas di 50 quota di e prestamo Brasileño pa construi Puerto di Mariel, e zona franca nobo di Cuba.
