(EFE) – Gobierno Cubano y Club di Paris a acorda pa modifica nan acuerdo di renegociacion di e debe Cubano, na e momento aki di situacion di impago, segun un comunicado publica na Paris.
E acuerdo ta duna gobierno Cubano mas tempo pa realiza varios pago cu lo mester a haci caba dentro di e convenio firma na 2015. No lo tin rebaho di e sumanan acorda e tempo aya, e documento ta señala, cu a sali di e reunion entre e vice-promer ministro Cubano, Ricardo Cabrisas, principal negociador di debe externo, y Emmanuel Moulin, director general di Tesoro y presidente di Club di Paris.
Cabrisas a bisa cu e impagonan tabata debi na e “aumento sin precedente di e bloqueo economico, comercial y financiero di Merca y e impacto di fenomeno asocia na cambio climatico y e pandemia di Covid-19”.
Cuba a firma na 2015 un historico acuerdo cu Club di Paris, cu a pordona 8.500 miyon dollar di un debe total di 11.000 miyon dollar, cu e compromiso di paga den cuota e suma restante te 2023. Cuba a keda sin cumpli parcialmente cu nan obligacion na 2019, y na 2020 a declara su mes incapaz di asumi e cuota.
Cuba a solicita un moratorio di dos aña pa un total di 200 miyon dollar na pago atrasa na e organismo multilateral, cu a acepta un aña so cu e posibilidad di renegocia.
Gobierno Cubano ta anticipa e aña un deficit fiscal equivalente na 18% di su PIB (GDP), cu na 2020 a disminui cu 11% despues cu turismo di exterior a keda reduci na un minimo pa e pandemia y na 2021 apenas ta spera recupera mitar di loke a perde, segun cifra oficial.
