Despues cu nan a keda deteni pa casi dos siman na varios pueblo di Caribe Colombiano, den un travesia cu hopi risico via terestre y maritimo, cerca di un miyon di migrante Cubano, Haitiano, Asiatico y Africano, diamars pasa a crusa e golfo di Urabá, na nort di Colombia, y a drenta Panama cu e fin di alcansa nan meta: Merca.
Aunke e number exacto di migrante cu a avansa di Colombia pa Pamana no ta precisa, e mesun biaheronan y pobladonan di e region a señala cu tin entre 600 y 1.000, di lo cual un parti grandi ta Cubano.
E migrantenan a cubri e ruta maritimo entre tres poblado di e costa di Colombia. E biahe ultimo a sali cerca di 2or di atardi di diamars.
“Den 11 boto, cada un cu capacidad di 50 pa 60 pasahero, 473 migrante adulto y 90 mucha a biaha di Turbo pa Capurganá”, segun Fabricio Marín, administrador di e waf di Turbo na Antioquia a bisa.
E biaheronan a pasa e tramite di migracion final di autoridadnan Colombiano na e salida di Capurganá y nan a continua e travesia pa Panama via terestre of maritimo.
Migracion Colombia a reporta cu un comite di e canciyeria di Colombia a biaha na e zona. Tambe a ser revela cu Christian Krüger, director di Migracion Colombia, e siman aki tabata na Panama pa haci negociacion cu e gobierno Panameño, cu na februari a bati alarma cu tampoco lo permiti e paso di biaheronan sin e documentacion rekeri den su teritorio.
A pesar di esey, e biaheronan indocumenta a pasa di Panama pa Costa Rica pa e caminda di frontera “ciego” y nan ta dirigi pa Mexico. Panama a anuncia cu lo debolbe e stranheronan cu a integra un similar expedicion na februari pasa.
