(CibreCuba) – Central electrico flotante Turco, Karadeniz Powership “Erin Sultan”, a yega diadomingo na e puerto di Santiago, desde cual lo conecta e sistema di electricidad nacional (SEN).

 

E central electrico flotante Turco di 240 MW a bandona e puerto di La Habana diamars y a nabega den awanan teritorial cu destino pa Santiago di Cuba, segun reportahe di periodista di medionan oficial ta indica.

“Ta nabega pa Santiago de Cuba un central flotante cu lo substitui e central ubica den e bahia oriental. Esun cu ya caba a sali pa Santiago de Chile a cumpli su tempo di contract na Cuba,” e reportero di ,television Cubano Lazaro Manuel Alonso, a sigura citando manera fuente e reunion anual di Ministerio di Energia y Mina.

Na final di februari, gobierno a anuncia cu nan lo manda un unidad di generacion mobil na e otro banda di Cuba pa mitiga e crisis agudo di electricidad na e pais, despues di tres blackout masivo cu a afecta principalmente e region oriental.

“No por haci esey den un dia. Mester start e motornan di generacion mobil, mester move pa eynan, mester crea condicionnan, pero nos ta trahando rapidamente,” director general di Union Electrica (UNE), Alfredo Lopez Valdes a splica.

E decision, agrega na e entrada di SEN di e termoelectrico Felton, cu su mantencion a termina e prome dianan di maart, tabata e clave di e strategia pa pone fin na e crisis grave cu ta laga Cuba sin luz, segun e funcionario.

“Eynan bo ta tin e solucion di e problema: den cu Felton ta drenta y den cu nos tin e generacion mobil na e zona ey,” Lopez Valdes a bisa, afirmando cu ya e tabata trahando na Santiago de Cuba pa ricibi e generacion mobil.

Na februari Ministerio di Energia y Mina a informa di e yegada na Bahia di La Habana di e central electrico flotante “Erin Sultan”, e di ocho di su tipo instala na Cuba. Den e ocasion ey, e entidad a splica cu su yegada na e capital Cubano tabata pa apoya e generacion di electricidad na e pais.

E centralnan electrico flotante, diseña riba un barco na cual ta pone motor, ta opera na Cuba desde 2019 y ta fruto di un acuerdo entre e gobierno Cubano y e empresa Turco Karadeniz Holding.

Segun palabranan di Lopez Valdes na feburari, e ubicacion di un unidad di generacion mobil na e oriente di pais ta sirbi pa ekilibra un sistema den cual tin un concentracion halto di generacion na e mita occidental y door di esey, un transferencia halto for di e zona occidental pa e oriental.