(CiberCuba) – E gobierno di Canada a adverti na su ciudadanonan cu ta desea di biaha pa Cuba tocante e escasez di articulonan di prome necesidad cu tin na e isla Caribense.
Den un comunicado, e gobierno di Canada a pidi su ciudadanonan pa nan tin precaucion extremo ya cu na Cuba tin falta di alimento, medicina y combustibel.
“Cuba ta enfrenta un escasez cronico y grave di articulonan di prome necesidad, entre nan: alimento, awa den boter, medicamento, combustibel y moneda fuerte,” e texto ta bisa.
E documento ta remarca cu e escasez di combustibel ta critico y ta afecta un grupo grandi di servicio, no solamente e transport, si no tambe e funcionamento di e hotelnan y e pomp stacionnan, unda filanan largo ta wordo produci.
“E servicionan di transporte publico, incluyendo taxinan, hopi biaha ta wordo interumpi, loke ta laga e turistanan cu poco opcion pa biaha. Algun di e biaheronan a keda temporalmente sin gasolin cu autonan di huur. Ta posibel cu e hotel- y complehonan turistico, cu hopi biaha ta usa generator durante e blackoutnan, no por mantene nan servicionan,” e ta detaya.
Como consecuencia, ta conseha e turistanan pa hiba cu nan articulonan di higiena y medicamento, y pa tene disponibel un suministro di awa, alimento y combustibel y un kit di emergencia completo.
Canada ta mantene ademas e advertencianan pa peliger di hortamento, agresion, fraude, estafa, prijsnan falso di e taxinan, blackouts, acoso sexual na e muhenan, camindanan insigur, droga den bebidanan y mal conexion di internet.
Durante algun aña Canada tabata e pais principal pa turismo na e isla, pero e cifranan ey a baha debi na e insatisfaccion pa e servicionan cu nan ta ricibi.
Den luna di juni, turistanan Canades cu tabata di vakantie na Cayo Santa Maria y cu nan avion a sufri un daño, a denuncia cu e hotel unda nan a manda nan te ora cu nan por a bay back nan pais tabatin condicionnan di salubridad pesimo: e tabata sushi, sin awa y cu insectonan, haraña y colebra den e cambernan.
E escasez di productonan basico y e aumento di inseguridad ta algun di e motibonan door di cual no mester biaha pa Cuba, unda cu ademas hopi di e hotelnan ta den ruina, e servicionan di huur turistico ta di e peor calidad y e ciudad- y pueblonan ta destrui, unda cu ambientenan peligroso ta prospera y cu peliger cu e edificionan por derumba.
Na juli ultimo, e gobernante Miguel Diaz-Canel a admiti cu e pais no lo logra e 3.5 miyon di turista internacional cu e tabata spera di ricibi e aña aki, un golpi duro pa e intentonan di mitiga e crisis economico.
