Den un maniobra cu por wak como un desafio pa Merca na Latino America, un destacamento naval Ruso, lidera pa e Fragata Almirante Gorshkov, a yega dialuna pasa meymey di e creciente tension entre e regimen di Cuba y Washington.
E barco cu a yega na waf di Havana, ademas ta integra pa e boto di logistica Elbrus y e remolcador di rescate Nikolai Chiker, segun un periodista di AFP a constata.
Di acuerdo cu un comunicado di e Forsanan Arma Revolucionario (FAR), cu no a bisa e motibo di e bishita, e guardia marino Ruso lo bishita e Marina di Guera Cubano, y ‘lo recore luganan di interes historico cultural’.
E fragata, di 135 metro di largura y 15 di hanchura, a yega na e waf di crucero di La Habana, cu a dispidi 10 dia pasa e ultimo crucero di Merca, despues di e restriccion nobo contra e isla anuncia pa gobierno di Donald Trump.
Merca, cu ta aplica un blokeo economico contra Cuba desde 1962, a endurece su sancion contra e isla desde cu Trump a yega na poder na 2017, eliminando e acercamento cu su antecesor Barack Obama a haci.
Como continuacion di e serie di medidanan, manera prohibicion di biahenan di crucero, e limitacion di remesa di famia y activacion di titulo tres di e ley di Helm-Burton, Washington a agrega Cuba den su lista preto di trafico di persona diahuebs pasa.
