Cuba a propone na Republica Checa pa cancela e debe cu nan tin desde epoca di guera friu , cu un manera poco comun: cu rom.
E ministerio Checo di finanzas a bisa cu Cuba tin un debe di 276 miyon dollar, pa motibo di credito cu nan a adkiri desde epoca cu e dos paisnan tabata pertenece na e bloke comunista.
Si efectivamente Habana ta paga e debe cu rom, anto Republica Checa lo bay tin suficiente alcohol pa usa durante mas di un siglo. Agencia Checa di estadistica a bisa cu Republica Checa a importa rom Cubano cu un balor di 2 miyon dollar e aña cu a pasa.
Michal Zurovec, vocero di ministerio, a bisa cu nan pais ta prefera cu Cuba por paga e debe cu placa, y no cu rom. Algun tempo pasa Corea del Norte a propone paga nan debe di 10 miyon di dollar cu producto cu nan tabata traha a base di ginseng.
