Cuba ya caba ta pagando e factura di e medida di Merca pa frena e aumento di turista Mericano na e isla. Si e sector publico a wak varios dia pasa un leve aumento, esun cu ta traha independiente cu ta mas di 600.000, ta sinti hopi afecta.
E administrado di un restaurant di Jamainitas, na Havana, cu ta frecuenta pa clientenan “chic”, tabata comenta cu durante e di tres siman aki di juli su clientela a baha considerablemente. Ora nan a ser interoga pa e Mericanonan, nan a contesta cu ‘akinan no tabata bin e Mericano pero si e Cubanonan cu negoshi prospero na Havana bieu’.
Si e bishitanan pa Cuba lo baha den e temporada aki, 2019 lo bay ta particularmente duro pa e hende profesional den turismo, particularmente hendenan cu ta traha di manera independiente. E fluho di turistanan for di Merca pa Cuba tabata mantene un posicion halto te na e prohibicion di Trump.
Den ultimo aña, cerca di 400.000 Mericano a biaha pa Cuba cu 17 compania di crucero. E tendencia tabata halto te na e prohibicion sorpresa di Trump 5 di juni pasa.
Varios presidente, prome cu Obama, a investiga pa cuminsa e concepto di ‘people to people’. Un concepto apoya pa e democrata y admiti pa Cuba cual tabata encera trece un impulso den contacto y intercambio entre e dos pueblo. E tabata funciona mas cu todo riba esfera cultural, artistico of religioso. Donald Trump a considera cu esaki tabata un turismo disfrasa y a pone un fin na dje.
