Mescos otro teritorionan den region di Caribe, Cuba tambe ta sufriendo di e consecuencianan di Covid-19. Entre e cifranan mas alarmante cu vice-promer ministro y ministro di economia Alejandro Gil a divulga den e programa gubernamental “Mesa Redonda” tin esun di e trahadornan pa cuenta propio cu a para nan actividadnan.
“Durante e lunanan aki, tabatin 150.000 trahador estatal cu trabao interumpi y 250.000 trahador pa cuenta propio (‘cuentapropista’; red.) cu suspension temporal di trabao,” e ministro a reconoce.
“Pero incluso esnan cu no tin empleo interumpi o bao suspension temporal di nan licencia, tabatin un nivel abao di actividad tanto den sector estatal como no estatal,” el a sigura.
E cifra ta implica cu 41% di e casi 606.000 cuentapropistanan reconoci pa gobierno na 2019, ta fuera di operacion. Incluso promer cu a bin e restriccionnan imponi pa Covid-19, e cifranan oficial tabata mustra cu 37,7% di e poblacion Cubano den edad laboral no tabatin relacion laboral y tabata declara inactivo, ocupa cu hogar, incapacita o pensiona. E cantidad ta aumenta te 41% si tuma na cuenta henter e poblacion Cubano, cu ta casi 11.2 miyon.
Segun e Anuario Estadistico di Cuba, esector cu mas a crece na 2019 den empleo tabata hustamente sector priva, confirmando un tendencia ya adverti pa economista y expertonan. Pero awor un parti grandi di e mesun sector aki a paralisa actividad, y por lo tanto tambe nan entrada. En todo caso, Gil a prefera di no usa e termino “crisis” den su discurso na television y a referi solamente na “un momento di tension”, provoca pa “intensificacion di e bloqueo”, e caida di turismo y e paro imponi pa e pandemia, cu tambe a implica “ un gasto adicional den divisa”.
