Autoridad di Salud Publico na Cuba a informa cu a fayece tres Cubano mas ayera, loke ta pone e total di victima mortal di coronavirus na 24. E victimanan tur ta di Habana, y ta trata di persona di edad avansa, cu tabata padece di diferente problema di salud prome cu nan a contagia cu coronavirus.
Un di e victimanan tabata un homber di 88 aña di edad di e bario Consejo Popular El Carmelo, di municipio Plaza de Revolución, na Habana. E homber tabatin antecedente di enfermedad pulmonar cronico, hipertension y cancer di prostaat den fase terminal.
El Carmelo, na Vedado, ta un di e prome barionan cu autoridadnan a declara den cuarentena despues di e creciente cantidad di caso confirma di e virus.
Ayera Ministerio di Salud Publico (MINSAP) a informa cu a resulta positivo otro 48 caso mas pa COVID-19 na Cuba. Te na e momento ey tabatin un total di 814 caso. Segun informacion te cu 9 di april, siman pasa, Cuba tabata conta 515 caso, 15 morto, y 28 persona recupera.
Sin embargo, ayera a declara cu 151 persona a recupera, mientras 622 ta den hospital den condicion stabiel, segun estadistica oficial.
Doctor Francisco Duran Garcia, director nacional di Epidemiología di MINSAP, a detaya den conferencia di prensa cu actualmente tin 2.466 persona hospitalisa bao “vigilancia clinico epidemiologico” y otro 6.572 bao vigilancia di Atencion Primario di Salud na cas, loke ta indica un potencial grupo mas grandi persona contagia.
E pais a tuma un serie di medida pa trata di frena propagacion di coronavirus, entre otro paralisacion total di transporte publico na nivel nacional y cancelacion di tur evento grandi manera e desfile tradicional di 1 di mei. E prome casonan a keda detecta dia 11 di maart, tres turista Italiano.
