Cu hopi placer, e directiva di Aruba Karate Bond ta ricibi e seleccion di karate na Aruba bek. Ta trata aki di Janilaine Bello, Trinity Meza Orellana y Alejandro Gonzalez Lujan, kende a yega contento for di ruman isla Corsou despues cu nan a participa na e campeonato yama ‘Curaçao Open 2019’. E campeonato aki tabata uno di hopi accion, unda un total di 10 pais a participa, entre otro Boneiro, Argentina, Martinique y Trinidad.
E seleccion a wordo acompaña pa nan coach Alberto Gonzalez Lujan, kende ta satisfecho cu e resultado di 4 medaya total. Janilaine Bello a finalisa cu 1 medaya di plata den categoria ‘kata’ (combate imaginario tecnico). Tambe el a gana 1 medaya di brons den categoria ‘kumite’ (pelea/bringamento). Trinity Meza Orellana a finalisa cu 1 medaya di brons den categoria di ‘kata’. Compañero Alejandro Gonzalez Lujan a finalisa cu 1 medaya di plata den categoria ‘kata’.
E ekipo di coach, ‘sensei’ Alberto Gonzalez Lujan y ‘sensei’ Luis Escalona, ta sigui traha duro cu e seleccion pa hiba nan pa e siguiente reto. Aruba Karate Bond ta gradici na prome luga ‘sensei’ William Millerson di Corsou pa e invitacion y na segundo luga tur instructor, tur mayor, tur boluntario y specialmente Stichting Sportsubsidie Aruba, Fundacion Lotto pa Deporte, Comite Olimpico Aruba y Al Performance Training pa nan sosten pa karate di Aruba.
