E desaparicion di e monolito aki no lo sali den ‘Unsolved Mysteries’, pasobra un fotografo a resolve e caso despues di mira cuatro terestre ehecuta e accion.
Manera Bon Dia Aruba a reporta, e monolito aki a aparece den desierto di Utah dia 18 di november ultimo y a ser elimina misteriosamente apenas dies dia despues. Pero awo, fotografo Ross Bernards tin prueba cu cuatro homber a presenta riba e mesun anochi cu e tabat’ey cu su yiunan pa saca potret di e monolito.
Ross ta bisa cu un grupo di cuatro homber a yega despues cu su grupo, y manera cu nan tabata riba un mision, a desmantela e monolito den menos di dies minuut. Aparentemente no tabatin necesidad di usa herment.
Ross a bisa cu e tabata sinta eynan ta tuma un break na momento cu e grupo a yega diripiente y a bisa nan: “Mi ta spera cu boso a logra saca boso potretnan”, comosifuera e grupo a yega specificamente pa retira e structura briyante cu a captura henter mundo.
E fotografo a agrega: “Rapidamente nan a kibra e monolito y mientras nan tabata cargando esaki na e garoshi cu nan a trece, un di nan a bira wak nos back y a bisa ‘no laga niun pista’.”
Ross ta bisa cu e no a stop e grupo di bay cu e monolito, splicando: “Nan tabata corecto pa bay cune”, pasobra e siguiente dia, esaki a atrae gruponan grandi di hende na un desierto delicado.
Bottom of Form
