Dialuna hobennan pandiyero a secuestra cuatro trahador den un prizon na Guatemala, despues cu nan a mata dos prizonero y cinco mas a keda herida, den un pleito cu a cuminsa diadomingo ultimo. E protesta a bin como un reclamo di e prizoneronan pa asina haya un miho trato y mas beneficio den e centro aki, polis a informa.
“Ainda nan tin secuestra cuatro funcionario di seguridad,” Pablo Castillo, vocero di polis nacional a informa. Castillo a splica cu un trahador a ser libera pa e prizoneronan durante diadomingo marduga y el a ser hiba pa un hospital pasobra e tabatin algun herida na su curpa.
E bringamento na centro hubenil di privacion di libertad pa mucha homber, miho conoci como Etapa II, a cuminsa cu participacion di mas di 40 hoben cu ta pertenece na pandiya (gang) di bario 18, y cu a denuncia maltrato di banda di funcionario di seguridad, procuraduria di derecho humano a splica. E centro ta ubica na San José de Pinula, 10 kilometer na oriente di capital, cerca di Hogar Seguro Virgen de Asunción, unda a tuma lugar e incendio riba dia 8 di maart y cu a laga mas di 40 hoben morto y cerca di 18 cu hopi kemadura na nan curpa.
Prensa local a revela un serie di peticion di banda di e prizoneronan, unda nan ta solicita e retorno di nan compañeronan cu a ser manda pa otro centronan, como tambe e acceso na cuminda den e prizon y permiso pa haya bishita, entre otro. “Awor ta mantene un dialogo cu varios institucion y asina logra cu un grupo di prizonero por laga nan actitud violento”, vocero di polis a splica. Durante henter e problema cu a tuma lugar diadomingo, personal di auxilio a raporta un incendio den un seccion di e edificio.
Ambos prizon ta administra pa secretaria di bienestar social di presidencia di Gautemala, y su titular Carlos Radas hunto cu otro dos funcionario ta e autoridadnan responsabel, sin lubida e director di e centro ey, cu a keda despedi y ta den prizon preventivo. E prizon conoci como Etapa II tabata escenario na aña 2005 di un bringamentoentre pandiya cu a laga como 14 morto.
