Cuatro di cada dies Peruano a stop di haya un entrada despues cu a keda forsa pa detene su actividadnan, pa via di aislamento vigente desde 16 di maart debi na e pandemia COVID-19, segun un estudio a publica diamars ultimo.
42% di Peruano a perde trabou of nan no ta hayando un entrada durante e cuarentena, segun e estudio di e firma Ipsos publica den e corant El Comercio, riba e impacto di e virus den economia Peruano.
Un 20% di e personanan sin entrada normalmente ta ubica tras di e grupo cu a keda afecta cu su salarionan: ta trata di studiantenan, hubiladonan y ama di cas.
Den contraste, un 14% ta haci trabou for di cas, 11% ta ricibi pago sin traha, 8% ta asisti na trabou cu autorisacion y 3% ta sali traha memey di e cuarentena aunke no tin autorisacion. 2% cu a keda no a precisa su situacion.
E bendedo riba caya, cu ta biba di su dia pa dia, a disparce di e cayanan di Peru, por ehemplo.
Economia Peruano ta informal aunke ta parce increibel, y apenas un 30% di empresanan tin su personal riba lista, segun cifranan oficial.
E cuarentena a forsa un paralisis economico, debi cu ta autorisa solamente pa habri e negoshinan esencial, como mercado, botica y banco.
E Peruanonan mester keda te dia 26 di april den aislamento na cas y toque de queda den oranan di anochi pa e pandemia, loke a afecta su economia, cu ta esun mas dinamico di Latino America den decada ultimo.
