Cuatro aspecto pa considera prome cu bebe suplemento

(self.com) – Si bo rutina mainta ta involucra bebe un cantidad di suplemento dietetico cu speransa pa reforsa bo energia of combati malesa e siman aki of enfermedad a largo plaso, bo por considera reduci esaki y pensa bo maneho di nobo, specialmente si bo ta kere cu bo no mester discuti bo regimen di suplemento cu bo dokter.

Maske suplemento dietetico por hunga un rol den alivia un deficiencia di vitamina of desbalance nutricional, generalmente esaki no ta necesario pa hende cu tin un dieta balansa y por hasta representa un riesgo pa salud, segun Donald Hensrud, M.D., MPH, director di e Mayo Clinic Center Healthy Living Program, a bisa Self.

“E ironia ta cu hende ta bebe suplemento pa mehora nan salud, pero tin tiki evidencia pa sugeri cu nan ta haci esey”, Hensrud ta bisa. “Y algun suplemento por hasta causa daño – sea a traves di toxicidad directo of den combinacion cu otro remedi of suplemento.”

Pues, sea bo ta pensando riba suplemento pa mehora salud of ya bo ta bebe algun, aki con pa sigura cu bo ta hacie di un forma cu ta yuda na luga di causa daño.

1. Como regla general, haya bo vitamina y nutriente di cuminda
Prome cu gasta cantidad di placa riba suplemento, bo mester sa cu un dieta balansa usualmente lo duna suficiente vitamina y nutriente necesario, a menos cu a diagnostica un deficiencia. Es decir, come fruta y berdura, grano henter y simia, y fuentenan di proteina saludabel, y esey lo ta suficiente.

2. Ta na altura cu sumplemento no ta mesun safe y regula manera ta asumi
Tin dos pensamento hera tocante seguridad di sumplemento cu por causa problema. E prome ta asumi cu si e ta disponibel sin receta na un botica of tienda ‘natural’, ta safe pa tum’e. Desafortunadametne, status sin receta of hasta un label bisando cu ta ‘completamente natural’ no ta nifica cu e no lo tin efectonan dañino.

E otro ta cu autoridadnan ta regula suplemento pa sigura cu nan ta safe. Mientras botica y otro punto di benta por check nan producto prome cu pone nan na benta, esey no ta garantisa cu e calidad y concentracion ta segun nan ta bisa. Ademas, rol di autoridadnan manera FDA na Merca den regulacion di suplemento dietetico ta limita. Nan ta inspecciona establecimentonan di manufactura pa calidad di producto, label y loke ta bisa ta haci, y ta monitor efectonan adverso reporta despues cu e producto ta na benta. Te ey.

3. Semper check cu bo dokter prome
E motibo principal pa discuti bo uso di suplemento cu dokter ta seguridad. Suplementonan dietetico – incluyendo vitamina y mineral – por interferi cu remedi prescribi, y bebe un dosis mas grandi cu recomenda por tin efectonan adverso.

Otro motibo ta cu loke bo dokter no sa bo ta bebe por tin efecto riba bo cuido medico ora bo bira malo.

4. Sa cuanto bo mester bebe – y cuanto en berdad bo ta bebe
Otro pensamento ekiboca tocante suplemento dietetico ta cu si un vitamina of mineral ta bon pa bo, aumenta bo consumo por tin beneficio adicional pa salud. Rebecca Ruud, un internista y profesor asocia di medicina na Universidad di Washington, algun biaha ta encontra e pensamento aki – loke e ta yama ‘vitaminosis – den su pashentnan. “Ademas di gasta placa por nada, bebe mas di loke bo mester ta dañino.”