Segun informacion di Ministerio Publico, ayera fiscal a laga cuater sospechoso bay den libertad relaciona cu caso di asesinato na Jaburibari. E motibo ta cu e investigacion a mustra cu nan detencion no ta rekeri mas. Tur cuater ta ciudadanonan Canades.
Nos a puntra Ministerio Publico kico ta bay pasa cu e cuater sospechosonan aki den libertad, si nan ta bay bek Canada of ta bibando aki na Aruba. Ministerio Publico no tin nada di haber cu e proceso aki segun nan ta informa nos, nan a sali di cel y fuera di esey ta kita man di nan. “Si nan ta den periodo cu nan mag di keda Aruba como stranhero, anto nan ta keda. Si nan kier bay, nan ta bay,” vocero Ann Angela di Ministerio Publico ta bisa. Cuater sospechoso ta keda den detencion anto nan lo wordo hiba dilanti hues comisario diahuebs awo. E acusacion ta asesinato. Ministerio Publico ta den contacto cu autoridadnan Canades. E investigacion ta continua.
Sospechoso Gibson
E sospechoso Gibson ta deteni ainda. Manera cu nos a informa, 1 aña atras, Bon Dia Aruba a trece e noticia di un di e sospechosonan Gibson dilanti como cu e la drenta Aruba pero nunca mas a sali bek. Gibson lo a tira Julian Weekes di 27 aña den e marduga di April 2 2016 dilanti di FUSE Restaurant na 366 Queen Street. Weekes asina mes a logra cana yega na e parkeer plaats di un Shell gas station, na unda e la cay den otro despues di a ricibi varios impacto di bala na su curpa y fayece na e sitio. Polis na Toronto ta bisa cu Weekes lo a bay un acto di condolencia pa un amigo di dje cu a wordo tira mata ariba Maart 24. Investigacion a bin determina cu esun cu a tira ta Michael Teddy Gibson di 29 aña (e tempo ey). Segun polis a sigui bisa Weekes y Gibson conoce otro, y cu nunca Weeks a considera Gibson como menasa pe. Polis a sigui bisa tambe cu danki na testigonan di unda e incidente e tuma y tambe camara di siguridad cu nan ta ken a tira. Gibson, kende tambe ta wordo yama Tyrone lo a drenta Aruba ariba April 5 2016, pues tres dia despues cu e la comete e asesinato na Toronto y no a sali mas di e isla.
Version policial di caso Jaburibari
Riba 1 di mei ultimo pa mas o menos 05.21 melding a drenta via Centrale Post cu un persona a wordo asesina na Jaburibari. Ora patrouille a yega na e sitio enberdad a constata un persona drumi ariba vloer cu no ta duna señal di bida. Dr Cime Texier a constata morto 07.00 y e curpa wordo tuma den beslag door di fiscal Rammeloo. Un rato despues un persecucion a cuminsa na altura di McDonalds Palm Beach di un KIA Sportage numera V-966. Na e momento cu nan a wak patrouille pa un motibo of otro nan a pasa door di luz cora, treciendo bidanan di otronan na peliger y core bay nengando stopteken di polis. E persecucion a termina na altura di Aruba Bank Hato caminda cinco persona a wordo deteni, tres masculino y dos femenino. Durante persecucion, un di personanan den e auto a tira un gran cantidad di biljetenan for di auto y probablemente mas cos. Na unda e biljetenan a wordo tira ariba caminda un cantidad a wordo tuma den beslag. Investigacion lo determina si nan tabata tin di haber cu e caso na Jaburibari.
