Ministerio Publico a confirma na Bon Dia Aruba cu ta asina cu cuater persona ta sospecha di abusa sexualmente di un mucha muhe di 13 aña. A detene tur cuater algun tempo atras y hues comisario a laga un di nan den libertad, pero ainda e ta keda un sospechoso.
Tin un investigacion andando riba tur cuater sospechoso cu ta mayor di edad, hombernan grandi, segun Ministerio Publico. Nan a keda deteni relaciona cu denuncia di abuso sexual contra un mucha menor di edad. Nan lo a abusa sexualmente di un mucha muhe cu e tempo ey tabata tin 12 pa 13 aña di edad ora cu e acto a tuma luga. Mas cu esaki Ministerio Publico no a comparti cu nos matutino, pendiente e investigacion cu ta sigui.
Reaccionnan online
Riba rednan social naturalmente varios hende a reacciona riba e noticia aki publica via coleganan di prensa masnoticia.com . Un di nan sigur ta Lisette J. Gomes di Fundacion Lisette Gomez: ‘Stop abuso sexual di mucha.’ El a expresa cu bo no por tin ‘relacion sexual’ cu un mucha menor di edad, esaki mester wordo categorisa manera abuso of violacion. Referiendo pues na e manera con esaki hopi biaha ta wordo categorisa den nos comunidad. Hopi tabata e comentarionan tambe riba ki castigo e sospechosonan aki ta bay haya, cual ta un topico di basta tempo caba den boca di pueblo. Varios hende a yega di comenta cu nan ta haya cu esnan acusa di abuso sexual contra menor di edad no ta haya castigo halto na Aruba. Bon Dia Aruba tabata pendiente cu entre otro Bureau Sostenemi pa mira kico ta nan bista actualmente riba e problema aki na Aruba. Nos kier combersa riba kico ta e maneho y pakico tin hopi keho di casonan cu aparentemente ta pega sin solucion pa basta aña. Te ainda nos ta pendiente cu e instancia aki y otro expertonan pa un entrevista riba e tema.
