Prome Minister, Evelyn Wever-Croes a yega di informa cu cuater pashentnan positivo pa coronavirus/Covid-19 ta interna den hospital. Un di nan ta den unidad di cuido intensivo (ICU). El a bisa cu e persona aki ta stabiel, pero e ta den ICU, y a desea un pronto recuperacion.
Ayera tardi, Eugene Maduro di seccion di Epidemiologia di DVG, a informa riba e casonan considera como severo di Covid-19. Nan ta cuater caso, ya cu nan mester wordo interna den hospital pa cuido mas specialisa. El a informa cu te ainda tin un persona cu ta interna na ICU.
Segun Maduro e pashent masculino di 46 aña ta conecta na mashin di respiracion artificial. Tambe tin un persona femenino di 61 aña cu ta den e Medium Care Unit (MCU) y dos persona femenino di 52 aña y 71 aña interna den hospital den e piso general cu a wordo condiciona pa atende cu e tipo di pashentnan aki. Nan mester di e cuido specialisa, pero no critico manera esunnan cu ta interna den ICU.
Igualmente el a laga sa cu e grupo cu ta wordo mas afecta, nan edad ta entre 25 pa 44 aña. Esaki ta e grupo cu nan ta considera como un ‘grupo reproductivo,’ kiermen hendenan cu ta move mas den comunidad, y esey ta pone cu e malesa por plama mas facil. Di e grupo di 55 persona positivo -segun update duna te cu ayera tardi- un 26% di nan ta trahadonan di e sector di cuido. Un 28% ta personanan cu ta traha den e sector di hospitalidad (hotel, restaurant, airport, etc..) Y un 46% ta otro tipo di ocupacion.
