“Awe ta un dia berdaderamente remarcabel” tabata palabranan di Ronella Croes, directora di Oficina di Turismo (A.T.A.), durante e celebracion cu a tuma luga na Fort Zoutman dialuna anochi. Como un socio strategico, A.T.A. ta sumamente orguyoso di por anuncia reanudacion di e cuater museonan bao di maneho di Fundacion Museo Arubano (FMA).

Aki ta trata di Museo Historico Arubano, Industry Museum, Community Museum y Carnival Euphoria. E reapertura di e museonan aki ta duna pueblo di Aruba y bishitantenan e oportunidad pa explora y aprecia nos historia y herencia cultural mas di cerca.

Den pasado, A.T.A. orguyosamente tabata duna aporte na museonan cu ta wordo opera pa FMA. E acuerdo nobo entre A.T.A. y FMA ta mara den esfuersonan pa preserva y promove historia y cultura di Aruba – un di e aspectonan clave cu A.T.A. ta enfoca riba dje. Como parti di e acuerdo nobo, A.T.A. no solamente lo percura pa e museonan ta habri, pero tambe lo traha di cerca cu FMA pa garantisa e promocion necesario pa atrae bishitantenan na nos museonan.

Durante su discurso, directora di A.T.A. a elabora riba e importancia di bon colaboracion entre socionan: “E siguiente añanan ta esencial pa restructura y posiciona nos museonan existente pa yega na un plan sostenibel. Pa e motibo aki e ta di suma importancia pa A.T.A., como un socio strategico, hunto cu su Excelencianan Minister Dangui Oduber, Minister Xiomara Maduro, y FMA anuncia e reanudacion di e cuater museonan aki. Como compromiso pa yuda trece nos cultura dilanti, A.T.A. ta sigui duna realse na e cuater museonan aki como un aspecto cardinal pa nos comunidad y nos turismo.”

Nos museonan, cual ta un refleho di nos identidad, ta duna nos e oportunidad pa conoce nos

pasado y aprecia nos herencia. Simplemente, museonan ta yuda den educacion, inspiracion y

conexion entre comunidadnan.

Banda di e museonan, A.T.A. ta orguyoso di entre otro por carga e Aruba Art Fair, di cual e di seis edicion lo tuma luga na September. Tambe A.T.A. ta contento di por brinda aporte na Dia di Brazil, Bon Bini Festival, Carnaval y otro celebracionnan nacional cu ta inclui Festival di Dande, y Himno y Bandera. Tur esakinan ta ehempelnan concreto di A.T.A. su compromiso pa aporta na experencianan cultural valioso, tanto pa pueblo di Aruba como tambe pa tur cu ta bishita nos isla.

Reapertura di museonan

Den un comunicado di prensa, minister di Cultura, Xiomara Maduro a informa cu recientemente a reuni cu Sr. Renwick Heronimo di Fundacion Museonan Arubano (FMA) pa asina repasa e plan pa e cuater museonan cu ta cay bao encargo di FMA por habri back pa comunidad y bishitante. Ta trata di Museo Historico na Fort Zoutman na Playa, Museo Industrial, Community Museum y Euforia Carnival Exhibition na San Nicolas, cu ta habri nan portanan back pa ricibi bishita di nos localnan y tambe bishitante cu kier sa mas di Aruba su historia.

Debi na e pandemia e museonan bao encargo di FMA a cera nan porta pa publico door cu FMA no por a sigui conta cu e fondonan cu turismo tabata genera y cu via ATA y APA tabata yega na e museonan. Tabata un situacion hopi dificil pa cual no tabata tin un solucion inmediato. Ministerio di Cultura di su parti a percura pa e coleccionnan por a wordo bon cuida pa asina e museonan por a keda bon conserva te ora FMA por a yega na e fondonan necesario pa bay back den operacion. Awor den cooperacion cu e partnernan di semper, ATA y APA, FMA ta logra pa cuminsa back cu e operacion di e cuater museonan.

Durante e reunion Sr. Heronimo a duna un bista di e plannan pa e museonan pa e resto di aña 2023, y tambe pa locual lo bira e actividadnan pa añanan 2024 y 2025 pa e museonan. Ta cuminsa operacion di e museonan buscando personal y tambe boluntario pa yuda atende cu publico. Tambe lo traha riba e coleccionnan cu ainda mester wordo exhibi pa nan tambe por yega na conocemento di nos localnan y bishitante. Pa e ultimo aki tambe ta masha importante pa FMA por conta cu e colaboracion di mas partners den comunidad cu kier cumpli cu nan deber civico aportando na bienestar di conservacion di e cultura di Aruba.

Minister Maduro ta gradici y desea Sr. Heronimo y tambe e hunta di directiva nobo di FMA hopi exito cu e ehecucion di e plannan pa e cuater museonan por habri nan portanan back pa comunidad y bishitante.