Grupo di rescate a salba miles di persona for di un awasero fuerte cu a dal e pais. Un ‘diluvio’ cu autoridad ta bisa cu a mata 4 persona y a cera aeropuerto, trein, caminda y scol.
E tormenta a yega Valencia, Murcia, oost di Andalucia, lagando mas di 3.500 persona cu mester di rescate di emergencia, asina a bisa Minister di Interior, Fernando Grande-Marlaska. Awasero a forsa cu aeropuerto di Almeria y Murcia a cera.
Mescos cu linea di trein, scol y caminda principal. Autoridad a pidi pa residente evita di core auto. Sergio Gil, hefe di agencia di proteccion civil na Los Alcazares, a bisa cu region di costa di Murcia tin alrededor di 15.000 persona cu a keda bou awa casi completo. “Nos ta rescatando un persona cada 10 minuut.”
Un persona a muri na Almeria despues di a keda cera den su auto ora cu a drenta den un tunnel cu tabata bou awa. Polis a bisa cu e victima tabata un homber di 48 aña di edad cu a ignora advertencia di polis.
Servicio di emergencia na Andalucia a bisa cu un otro hende homber di 36 aña di edad a muri ora cu su auto tambe a bay bou awa na Jamula, 100km den tera na Almeria. E tormenta na Spaña ta un ‘fenomeno meteorologico anual den temporada’ pero ta di mas fuerte e aña aki.
Servicio di emergencia pa e region di Murcia, a rescata 391 persona den auto y cas bou awa, incluyendo algun helicopter di polis cu mester a efectua rescate for di dak di edificio cu tabata rondona di awa.
Lider regional, Fernando Lopez Mirasa bisa cu unidad di ehercito a rescata 60 persona di un campamento cu a corta pa inundacion. “Henter e region di Murcia ta bou awa, nunca nos a pasa pa e situacion aki”, el a bisa.
