Cuater ministerio a uni pa financia fase cuater di proyecto di camara di siguridad

Ayera mainta durante conferencia di prensa di Gobierno di Aruba a anuncia e firmamento di e decision ministerial y oferta pa ehecucion di fase cuater di e proyecto di camara di siguridad. E proyecto aki ta un proyecto multi-ministerial y ta conta cu sosten y participacion di Ministerio di Husticia y Asuntonan Social; Ministerio di Salud Publico y Turismo; Ministerio di Asunto Economico, Comunicacion y Desaroyo Sostenibel; y Ministerio di Integridad, Naturalesa, Transport y Asunto di Adulto Mayor.

Minister Rocco Tjon a indica cu manera ta conoci caba e plan di maneho di Ministerio di Husticia pa loke ta combati criminalidad ta enfoca specificamente ariba inversion den tecnologia pa asina combati criminalidad, pero na mesun momento tambe pa percura cu e unidadnan policial por traha mas a base di informacion.

El a splica cu ya caba tin diferente fase a wordo ehecuta pa loke ta e proyecto aki. Na e area hotelero den e area banda di lama ya caba a instala camara, den e ‘hot zone’ tambe e ehecucion ta andando, tin tambe centro di ciudad di San Nicolaas y Operation Command Center na Savaneta cu ta bay ta e curason di e proyecto aki caminda tur e imagen di e diferente fasenan aki ta bay wordo centralisa.

Banda di esey, el a agrega, tin e cuarenta punto strategico cu ya caba ta ekipa cu camara y e firma pa e siguiente fase aki, fase cuater, ta trata centro di ciudad na Oranjestad.

Minister Tjon a sigui splica cu mirando tur e areanan cu e proyecto aki ta bay enfoca riba dje, a uni forsa den cuater ministerio. “Tin e areanan turistico y pa e motibo aki Minister di Turismo Dangui Oduber a uni pa cubri parti di e gastonan. Tambe tin areanan cu ta hopi importante pa comercio, areanan cu ta trata e tema di parkeo, y pa e motibo ey coleganan Geoffrey Wever y Ursell Arends tambe a uni pa e proyecto aki,” el a menciona.

Ministerio di Husticia ta carga e proyecto aki y segun e minister a señala tin otro localidadnan tecnico cu ta bay wordo ekipa cu camara tambe.

Minister Tjon a remarca cu for di comienso di Gabinete Wever-Croes II Aruba tabata conoce cero camara pa loke ta trata e tema di eleva siguridad y den dos aña tin mas di 250 camara instala pa asina aumenta siguridad na pais Aruba.

El a subraya cu caba den cifra nan ta ripara un reduccion den e diferente tipo di criminalidad cu tin, particularmente ‘high impact crime’ (crimen di impacto halto).

Pa e proyecto aki, Miniter Tjon a resalta, e grupo di trabao cu nan a instala pa guia full e proyecto di camara di siguridad ta estableci pa un orden ministerial y cu ta consisti di profesionalnan di sector priva, sector publico y di cuerpo policial. Asina Gobierno di Aruba ta percura pa foutnan cu a wordo cometi den pasado no bolbe ripiti pa e proyecto aki por ta un exito.

Por ultimo, el a señala cu borchinan lo wordo pega den tur e areanan na unda lo instala camara di siguridad, cual ta obligatorio segun ley, pa asina tur hende sa cu e area cu nan ta bay drenta tin camara di siguridad.

Minister di Salud Publico y Turismo, Dangui Oduber, a remarca cu e proyecto aki ta hopi importante y pa e motibo ey cuater ministerio a uni pa pone fondonan disponibel pa eleva siguridad no solamente pa e comunidad local, pero tambe pa turistanan, un di e motibonan principal pakico Ministerio di Turismo tambe a participa pa pone fondonan disponibel pa por ehecuta e di cuater fase di e proyecto di camara di siguridad.

El a enfatisa cu e exito di turismo di Aruba ta depende di e vision, maneho, inversion den mercadeo, den producto Aruba pa mehora y embeyece producto Aruba, pero tambe den inversionnan den siguridad.

E minister a agrega cu na momento cu turistanan ta usa search engines pa busca nan destinacion pa pasa un vakantie, un factor cu ta hopi importante y determinante ta siguridad y Aruba keto bay ta wordo considera como e destinacion di mas sigur den henter Caribe, algo cu, el a subraya, mester percura pa mantene na tur momento.

“Nos ta contento cu nos tambe por participa pasobra esaki sigur lo bay yuda duna mas confiansa na nos bishitantenan pa asina por garantisa nan cu na tur momento nan ta sinti nan mes sigur na Aruba durante nan vakantie,” el a finalisa.

Minister di Integridad, Naturalesa, Transporte y Asunto di Adulto Mayor, Ursell Arends, a ratifica cu for di inicio Ministerio di Transporte a anuncia cu nan ta kere cu e pasonan cu a cuminsa duna pa loke ta trata centro di ciudad. Esaki ta yuda e elemento di parkeo pasa di un forma caotico pa un forma regula y den e vision cu gobierno ta implementando pa trece orden, regulacion y mobilidad den centro di ciudad, e parti di camaranan di siguridad ta yuda aumenta e siguridad di tur persona cu ta haci uso di parkeo den centro di ciudad.

“Netamente pa e motibo aki tambe una bes cu Minister Tjon a presenta e vision, a presenta e plan aki, nos a mustra disponibilidad di biaha pa participa den e proyecto aki y haci e fondonan disponibel. Esaki no solamente ta beneficio nos localnan, pero tambe turistanan cu ta haci uso di centro di ciudad,” el a remarca.

Minister di Asunto Economico, Comunicacion y Desaroyo Sostenibel, Geoffrey Wever, resalta cu e proyecto aki ta un oportunidad pa Gobierno uni y haci e proyecto realidad. “E ta un proyecto costoso y pa e motibo ey ta necesario pa nos tur uni forsa y pone nos fondonan disponibel, cada minister cu su mesun maneho y su mesun interes pa e proyecto aki,” el a bisa.

Pa loke ta trata participacion di su ministerio, Minister Wever a señala cu den tur e combersacionnan cu comerciantenan pa cu e desaroyo di centro di ciudad, siguridad ta un elemento hopi importante. El a agrega cu tin diferente problema cu nan a mira cu mester wordo regla pa por desaroya e centro di ciudad y siguridad ta un elemento importante.

“Mi ta kere cu e proyecto aki nos ta duna oido tambe na comerciantenan cu pa hopi luna ta vocifera nan preocupacion pa cu siguridad den centro di ciudad, pa inversionnan cu mester tuma luga pero cu tin miedo cu no tin control ni siguridad pa nan mesun inversion y nan bishitantenan. Mi ta kere nos a demostra cu nos ta scucha nan y hunto nos ta traha pa adresa e reto nan cu centro di ciudad tin,” el a finalisa.

Contestando pregunta di miembro di prensa tocante e cantidad di fasenan cu e proyecto tin y con ta scoge e localidadnan pa pone camara, Minister Tjon a resalta cu e grupo di trabao, den cooperacion cu Cuerpo Policial, a base di cifra ta indica cual ta e areanan cu tin mester di camara pa por sigui eleva siguridad. El a remarca cu esaki ta un ehercicio continuo cu ta wordo haci door di e grupo di trabao y pesey no por indica ainda cuanto fase lo tin ni ki ora esaki ta termina, pa diferente motibo, depende desaroyo pa loke ta trata criminalidad.

Banda di esey, el a menciona, tin camaranan flexibel cu por ser instala na un cierto area pa un momento pero despues por kita nan y despues por haci uso di nan den un otro area.

El a enfatisa tambe cu tur cos ta ser realisa a base di cifra y a base di e cifranan aki pa loke ta trata criminalidad ta tuma e decision unda ta pone e camaranan di siguridad.