Mañan lo tuma luga e apertura oficial di e 7 edicion di e Feria Agro Alimentario 2017  na Republica Dominicana. Un total di 170 invitado di henter mundo lo ta presente den e feria aki. Aruba hunto cu demas partnernan di reino Hulandes tambe ta invita.

Pa prome biaha nos isla lo haci presencia cu cuater empresa local cu ta importa productonan di agricultura y alimento, entre nan Frasa Traiding, Compra y Italo-Aruba Corporation. Vice-Consul di Asunto Comercial y Desaroyo di Negoshi di Consulado Dominicano na Aruba, Edward McCollum lo ta compañando e delegacion comercial cu lo biaha awe pa Sto. Domingo. E lo percura pa cada empresa local por logra nan meta particular di haci negoshi y asina exporta producto Dominicano pa nos isla.

E ta informa cu Camara di Comercio di Aruba (KvK) tin conocemento di e feria aki; y nan a yuda pa promove e evento aki tambe. Sinembargo ainda e consulado Dominicano no a sostene un reunion formal cu KvK pa pone nan na haltura di nan iniciativanan comercial.  Apenas cuater siman pasa e Consulado Dominicano na Aruba pa medio di sr. McCollum por a cuminsa promove e feria aki y asina nan a logra e participacion di cuater empresa local.

Feria y laso comercial
Institucionnan gubernamental manera Centro di Exportacion y Inversion di Republica Dominicana y Hunta Agro Empresarial ta organisando e feria. Minister di Agricultura lo haci e apertura di e feria aki representando e presidente Dominicano Danilo Medina, kende a percura pa aumenta e volumen di exportacion di nan productonan nacional.  Den apenas dos aña e  gobierno Dominicano a logra cu  e exportacion por a subi for di 500 miyon dollar pa 2mil miyon dollar pa aña. Nan ta exporta productonan cu ta bin for di nan sector primario di agricultura. Sr. McCollum ta bisa cu e interes principal di e Consulado di Republica Dominicana na Aruba ta esun di fortalece nan laso comercial entre nan pais cu e comerciantenan local. “E mester ta un relacion serio y confiabel di exportacion di Republica Dominicana di e tipo di productonan aki pa Aruba. Pero no solamente comestibel, sino otro tipo di productonan tambe.” Bou instruccion di e consul Dominicano na Aruba, sr. Zabala, mester crea un agenda di intercambio bilateral. E feria aki ta un oportunidad special pa logra e agenda aki.

Costo canasta basico ‘menos’
Sr. McCollum ta indicua cu Aruba ta un isla cu un fluho grandi di turista cu mester e apoyo di un consulado manera esun di nan, y tambe di e productornan Dominicano. Pero tambe nan ta haya importante e sosten y cooperacion di e comerciante di Aruba pa nan ta interesa di cumpra nan productonan di calidad halto y na un prijs rasonabel. Di e forma aki e costo cu tin e canasta basico lo bira menos pa e famianan na Aruba. E ta considera demasiado caro cu nos mester paga te hasta 5 florin of mas pa un awacati, mientras cu e producto aki na Rep. Dominicana tin un balor cuatro biaha menos.

E feria aki su atencion principal ta alimento, tabaco y bebida alcoholico. Como pais Republica Dominicana ta conoci como exportado grandi pa Europa di awacati, bacoba, berengein,  tomati, etc… Tambe frutanan manera mango y apelsina. Pero tambe Republica Dominicana tin un interes grandi pa exporta producto di agricultura y alimento pa e islanan di nos region Caribense.